"Gure_RBTK"

Donostia-San Sebastián 2019(e)ko uztailaren 11(e)tik 2019(e)ko irailaren 29(e)ra
  • "Gure_RBTK"

HANK, kTBot edo Galtxagorri robotikaren alorrean lan egiten duten euskal enpresa eta erakundeek diseinatutako edo produzitutako robotak dira; uztailaren 12tik irailaren 29ra ikusi ahal izango dira San Telmo Museoaren lehen solairuan, industrializazioari eskainitako atalena.

Gipuzkoako Industri Ingeniarien Elkargoa, Euskadirako diharduena Transformazio Digitalerako Bulego gisa, museoarekin elkarlanean aritu da GURE_RBTK izenburudun erakusketa txiki honen garapenean; euskal industria sarearen hainbat soluzio robotiko aurkezten dira bertan.

Erakusketan enpresa edo erakunde hauek hartuko dute parte: Larraioz Elektronika, Tecnalia, iK4-Tekniker, Tecnun/Ceit, Mondragon Unibertsitatea, UPV/EHU, SPIFF STUDIOS eta Gogoa. Inguru hurbilean diseinatutako edo ekoiztutako soluzio teknologikoen erakusk bat da, ezagutzera ematen duena bertako teknologia gaitasuna hainbat sektoretan, esaterako, industria, automozioa, eraikuntza, farmazia, elikadura edo osasuna.

Erakusketak, besteak beste, izango ditu mugikortasun urria duten gaixoen errehabilitaziorako exoeskeleto eta gailu robotiko bat, zamak mugitzeko edo zehaztasun handiko operazioak egiteko beso robotiko industrialak, pertsonekin lan eremua partekatzen duen robot kolaboratibo bat beso bikoitza duena, bisita gidatuak egiteko edo materiala garraiatzeko gida-robotak edo erabilera anitzeko dronak.

Erakusketan robot hauek daude:

Izena: Kuka KR3 Agilus
Erakundea: MONDRAGON UNIBERTSITATEA

Industria-ikuskapeneko zelula robotizatua, Mondragon Unibertsitatearen Industria Ingeniaritzako Masterrean eta ikerketa-proiektuetan erabilia. Industria-automatizazioko hainbat kontzeptu erabiltzea du helburutzat, hala nola PLCen programazioa, gizakia-makina interfazeak (SCADA), makinen segurtasuna, robotika industriala, sentsorika eta biki digitalak.

Izena: Mitsubishi PA10

Erakundea: TECNUN / CEIT

Robot kolaboratiboa, CEIT-IK4-k ikerketa-proiektuak egiteko erabilia. 2009az geroztik asistentzia-robot gisa erabili da kirurgia transpedikularraren alorrean, eta 2012az geroztik robotika-irakasgaietako praktiketarako robot gisa TECNUN Nafarroako Unibertsitatean. Torloju medikoak giza gorputzaren ornoetako kokapen zehatzean jartzea dute helburutzat.


Izena: HANK

Enpresa: GOGOA
Europan diseinatutako lehen exoeskeletoa da HANK, eta 3Dko inprimaketa-teknologia erabili da hura garatu eta fabrikatzeko lanetan. Gailu robotiko hau mugikortasun urriko pazienteen errehabilitazio- eta jarraipen-prozesuetan erabiltzen da, beheko gorputz-adarren mugimenduetarako laguntza eta asistentzia eskainiz. 

Izena: kTBot
Enpresa: IK4 – TEKNIKER
kTBot robot mugikorra, autonomoa eta multifuntzionala da, IK4-TEKNIKER zentroak diseinatua eta Kutxaren Gizarte Ekintzak finantzatua. Barnealdeetan jarduteko diseinatu da, eta, oinarrizko adimena duenez, pertsonekin elkarreraginean jardun dezake, gida-zerbitzuak eta informazio interesgarria eskainiz. Etengabe aldatzen ari diren inguruneetan nabiga dezake, pertsonen segurtasuna arriskuan jarri gabe.

Izena: Galtxagorri
Erakundea: UPV -EHU
Donostiako Informatika Fakultateko solairuetan barrena tourrak eskaintzen dituen multirobot sistema gidari baten parte da Galtxagorri. Robotek gidatze-zeregina partekatzen dute plataforma robotikoen arteko komunikazio sendo baten bitartez, eta robot bakoitzak solairu bakar batean dihardu. Erabiltzaile-interfaze atsegin batek bisitariari aukera ematen dio helmuga soil baten edo zenbait interesgune dauzkan ibilbide baten artean hautatzeko.

Izena: Kawasaki Robotics duAro
Enpresa: LARRAIOZ ELEKTRONIKA
Robot industrial kolaboratiboa, pertsonei laguntzeko lanak egin ditzakeena. Scara beso bikoitzeko egitura duenez, bi giza eskuren mugimendu eta zereginak egin ditzake, zehaztasun handiarekin. Pertsonen ondoan segurtasunez jarduteko diseinatu da robota.

Izena: Kawasaki Robotics MS005N
Enpresa: LARRAIOZ ELEKTRONIKA
Altzairu herdoilgaitz eta esterilizagarrizko robot industriala, medikuntza- eta farmazia-aplikazioetarako bereziki diseinatua. Osasun-industriaren berezko zehaztasun- eta garbitasun-eskakizun zorrotzak betetzen ditu abiadura handiko robot honek. Askotariko prozesuetan erabiltzen da, produktu eta lagin delikatu eta arriskutsuak mihiztatu, dosifikatu, ikuskatu eta manipulatzeko.

Izena: SPIFF 266-R

Enpresa: SPIFF STUDIOS

Tamaina handiko drone hexakopteroa, airetiko filmazioak eta erreskateak egiteko diseinatua.

Kalitate handiko karbonozko xasis modular batez eta lurreratze-tren ezkutakor batez osatua, azken horrek hainbat osagarri ezartzeko aukera ematen duelarik, hala nola kamera-egonkorgailuak eta salbamenduko gailuak jaurtitzeko sistemak. Aireratzeko gehieneko pisua 16 kg da.

Izena: MIRELA

Enpresa: TECNALIA

Robot kolaboratiboa, Tecnaliak pertsonekin espazioa partekatzen duten roboten ikerketa-lineari hasiera emateko hautatu duena. Plataforma mugikorra da, barnealdeetan autonomiaz nabiga dezakeena, soinuen bidez pertsonekin elkarreraginean aritzeko aukera ematen dion sistema baten bitartez.

Gipuzkoako Zientzia eta Teknologia Parkeko zenbait eraikinetan hasierako probaldia igaro ondoren, Tecnaliaren Robotika Saileko proba-plataforma gisa erabiltzen hasi dira.

Izena: ARMASSIST
Enpresa: TECNALIA

Gailu robotiko eramangarria, goiko gorputz-adarren errehabilitaziorako diseinatua. Bideojokoekin konbinatuta beso eta eskuen errehabilitaziorako tratamendu trinkoa ahalbidetzen die gaixotasun neuromuskularrak dauzkaten edota iktus bat izan duten pazienteei. Tratamenduaren eraginkortasuna handitzeko eta kostuak murrizteko aukera ematen du, eta, horrez gain, pazienteari tratamendu indibidualizatua eskaintzen dio.

 

Izena: Kawasaki Robotics BX100N

Enpresa: LARRAIOZ ELEKTRONIKA

Masa goratuak manipulatzeko eta puntuak abiadura handian soldatzeko robot industriala. Roboten kontzentrazio-dentsitate handiko aplikazioetarako diseinatua. Robot industrialekin ohikoa den bezala, langilea liberatu egiten du prozesu errepikakor, nekagarri eta osotasun fisikorako arriskutsuak izan daitezkeen betebeharrak egitetik.


Laburrean

  • Mota Erakusketa
  • Data 2019(e)ko uztailaren 11(e)tik 2019(e)ko irailaren 29(e)ra
  • Lekua San Telmo Museoa
    Zuloaga Enparantza, 1
    Donostia-San Sebastián
  • Web San Telmo Museoa

Non

Euskadi, auzolana