Gasteizko Udaleko Kultura Zerbitzuak Auzo Eszenaren denboraldi berria antolatu du XIV. edizioaren baitan. Otsailaren 16tik maiatzaren 11ra bitarte, gizarte-etxeetako ekitaldi-aretoetan eskainiko dituzte ikuskizunak. Igandeetan, 19:00etan, publiko guztientzako (gazteak, haurrak eta helduak) entretenimendua eta era guztietako modalitateak barne hartzen dituen eskaintza anitza izango da ikusgai: antzerkia, dantza, poesia, musika, pintura, zirkua eta mentalismoa.
"Kultura Sailean, arte eszenikoetako era askotako lanak aurkezten ditugu: antzerkikoak, musikakoak, zirkukoak... Baina Auzo Eszenaren aurkezpenak beti ekartzen du haize freskoa berekin. Dakizuenez, programak eskaintzen dituen ikuskizunak amateur talde eta konpainiek bultzatzen dituzte, eta horrexek ematen dio freskotasuna ekimenari. Gizarte-etxeetako agertokietara proposamen originalak, inklusiboak eta mota askotakoak igotzen dira. Horiei esker, edizio bakoitzeko programazioa paregabea izaten da", adierazi du Sonia Díaz de Corcuera Kultura eta Hezkuntza zinegotziak aurkezpen-prentsaurrekoan.
