Deialdi honen helburua da bitartekaritza kokatuko prozesu esanguratsuen eta bitartekaritzaren arloko ikerketa diskurtsibo eta metodologikoen garapena babestea eta sostengatzea, Tabakalerako Hezkuntza arloan egiten den lanean laguntzeko eta osagarri izateko.

Helburu bikoitz hori garatzeko baldintza material egokiak sustatzearren, deialdiak bi modalitate ditu:

1. Bitartekaritza-prozesu bat garatzeko egonaldia: Egonaldiak bederatzi hilabete iraungo du, eta Tabakaleraren hurbileko testuinguruan bitartekaritza-prozesu bat garatzeko espazioa, denbora eta baliabideak eskainiko ditu. Prozesua komunitate edo kolektibo espezifiko batekin lotuta aktibatuko da, kolektibo zaurgarrituekiko sentsibilitate bereziarekin; horrela, Tabakalerako Hezkuntza arlotik aniztasunaren inguruan gaur egun egiten diren ekintzekin bat eginez. Prozesua Tabakaleran bertan edo bere hurbileko/tokiko ingurunean antzemandako premietan oinarrituta garatzea da helburua.

Aukeratutako bitartekariak edo kolektiboak proposamena taxutu eta egonaldian gauzatu ahal izango du, 2025ko irailaren 29tik 2026ko ekainaren 26ra bitartean. Proposamen bat aukeratuko da lehenengo modalitate honetara aurkezten diren proiektu guztien artean.

2. Bitartekaritzan ikertzeko egonaldia: Egonaldiak hiru hilabete iraungo du, eta bitartekaritzaren inguruko ikerketa-proiektu bat garatzeko espazioa, denbora eta baliabideak eskainiko ditu. Ikerketa ez da bitartekaritza-prozesu baten garapenarekin edo programa baten aktibazioarekin lotuta egongo. Modalitate honen helburua arlo honetan ezagutza sortzen laguntzea da, baita ezagutza horren kolektibizazioa sustatzea ere, arlo honetan lan egiten duten gainerako eragileen eskura jartzeko tresna gisa.

Ildo horretan, hautatutako pertsonak edo kolektiboak proposatuko duen ikerketa-proiektuaren ikaskuntzak eta/edo ondorioak, beste pertsona edo testuinguru batzuek egokitu ditzaketen metodologia edo tresnetara eramangarriak izan behar dira. Proiektuak gai hauetakoren bati heldu beharko dio:

• Aurrera eraman den bitartekaritza-proiektu edo -praktika jakin bateko ikaskuntzen azterketa/ebaluazioa, berrikuspen kritiko gisa; praktika propio bat izan edo ez.

• Kultura-bitartekaritza garaikidearen testuinguruan premiazkoak diren gaiei, tentsio emergenteei edo oraindik heldu ez zaien debateei buruzko ikerketa bat.

• Moduei eta metodologiei buruzko ikerketa bat; non jasotzen diren bitartekaritza-proiektuetan ohikoak diren premiei heltzeko eta hauek garatzeko baliabide pedagogiko erabilgarriak.

Hautatutako bitartekariak egonaldian zehar taxutu ahal izango du proposamena, 2025ko irailaren 29tik abenduaren 21era bitartean. Proposamen bat hautatuko da bigarren modalitate honetara aurkezten diren proiektu guztien artean.

Bi egonaldi-modalitate horiek ez dute lanaldi osoz egotea eskatzen. Dena den, egoiliarrak konpromisoa hartuko du Tabakaleran antolatutako lan-eremuetan presentzia jarraitua izateko, testuinguruarekin eta Hezkuntza arloarekin harremanak ezartzeko eta/edo mantentzeko. Maiztasun hori batzordearekin adostuko da deialdira aurkezten den lan-egutegiaren proposamenaren arabera, eta jarraipen-bilera bat izango du hilean behin gutxienez. Bestetik, bi egonaldi-modalitateen artean, bat datozen hilabeteetan, gurutzatzeko eta trukatzeko espazioak sortuko dira.