Chillida Lekuk urriaren 12ra arte luzatu du Harri, Lurra, Huts erakusketa, Eduardo Chillidaren unibertso materikoa lurraren eta harriaren ikuspegitik aztertzen duen erakusketa. Berrogeita hamar pieza inguru biltzen ditu, Lurra ezagunak barne –txamota lurrezko eskulturak , baita eskultura monumentala eta formatu txikikoa ere, hainbat harri motatan, hala nola zementuan edo marmolean.
Erakusketak material horiek Eduardo Chillidaren bilakaera artistikoan duten garrantzia eta espazio transzendentalak sortzeko duten gaitasuna nabarmentzen ditu. Artelan multzoa Zabalaga baserriaren barruan dago, eskalaren eta materialaren arabera ordenatuta, eta, horri esker, harria eta lurra eskultorearen ekoizpenean aldizka nola agertzen diren ikus daiteke.
Erakusketan aztertzen diren hiru elementuetatik, hutsuneak betetzen du Eduardo Chillidaren rol pertsonalena. 60ko hamarkadatik aurrera, eskultoreak eskulturaren lana arkitekturara gerturatzen du, barruko espazioak sortuz. Hamarkada bat geroago, 70eko hamarkadaren erdialdean, Chillidak txamota lurra aurkitu zuen, dentsitate handiko lurra, eskultoreak erabilitako materialik bigunena.
"Elogio de la Arquitectura XIV" eskulturaren instalazioa
Gainera, Chillida Lekuren kanpoko espazioan artistaren obraren ikuspegia zabaltzeko, maiatzaren 21ean "Elogio de la Arquitectura XIV" artelana jasoko du museoak, Artium Euskal Herriko Arte Garaikideko Museoko Bildumako eskultura, 1994an egina. 3.900 kiloko pisuarekin eta oinarri angeluzuzen baten gainean lotutako hiru elementuz osatuta, artistak beti mirespen handia sentitu zuen diziplina bati egindako omenaldia da pieza hau: arkitekturari.
Chillida nahiko goiz aldendu zen arkitektura-estudioetatik eskulturari ekiteko. Eskultorearentzat arkitektura, batez ere, espazioan kokatutako bolumen multzo bat da, inguratzen dituen espazioan gorpuzten direnak eta elkar eragiten dutenak. Arkitektura edukiontzia da, barruko espazioaren azala, baina espazioa inguratzen duten eraikuntza-elementuak ere badira, plaza moduko batzuk osatuz.
Chillidaren kontzeptu arkitektonikoa laster igaro zen lehen planora bere eskulturetan. "Gero eta gehiago, 'hutsa' bere eskulturaren benetako objektu bihurtzen da, materiaz inguratua, ikusgai bihurtzeko. Horrela, hutsunea bere sorkuntzaren objektua izatera pasa zen, bere burua, eta beti ikuspegi eskultoriko batetik, espazioko arkitektoa balitz bezala hartuz" dio Estela Solanak, Chillida Lekuko erakusketen arduradunak. Zentzu horretan, Chillidak "dena" edo "ezereza" bezala ulertu du hutsunea zentzu filosofikoan.
"Elogio de la Arquitectura XIV" lanean hiritartzat har daitekeen espazio baten aurrean gaude. Proportzioak XIX. mendeko Europako hirietako zabalguneak osatzen dituzten etxe-uharteen antzekoak dira. Kasu honetan, kanpoaldearen barrualdea mugatzen duen etxe-uharte izango litzateke–publikoaren eta pribatuaren arteko muga deseginez–, eta betearen eta hutsaren arteko elkarrekintza ikertzen du.
2009tik, "Elogio de la Arquitectura XIV" Artium Museoaren kanpoko espazio publikoan egon da kokatuta, Eduardo Chillidaren obra publikoaren ikuskerarekin bat etorriz. Orain, Zabalaga baserriaren kanpoaldean kokatuko da, Chillida Leku museoan, ingurune berriarekin harreman berezia sortuz.
Chillida Lekuk Museoen Nazioarteko Eguna ospatuko du
Museoen Nazioarteko Eguna dela eta, maiatzaren 18an Chillida Lekuk doako bi bisita gidatu eskainiko ditu familientzat.
Lehenengoa 12:00etan izango da euskaraz eta bigarrena 16:00etan gaztelaniaz. Museoko hezitzaile taldeak esperientzia ludiko eta dibertigarri bat planteatu du, non haurrek, heldu batek lagunduta, eskulturak ukitu eta Chillidak sortutako espazioak esploratu ahal izango dituzten, bere formen unibertso amaigabea deskubrituz.
