Gaur goizean, Bilboko BBK Salaren ekoizpen propioa aurkeztu da prentsaurrekoan, hurrengo Aste Nagusirako propio sortutako muntaia. Horrela, hirugarren urtez jarraian, Kale Nagusiko antzokiak "Aste Nagusirako bereziki asmatutako jatorrizko eta kalitatezko antzerki-ikuskizunak sortzeko konpromisoa" berritu du, Koldo Bilbao BBKko Kultura arduradunaren hitzetan. ¡Agur, Otxoa feroz! (2023) eta Urte berri off! Feliz 2025 (2024) arrakastatsuen ondoren, 2025eko Aste Nagusian Confeti. El regreso estreinatuko da, Diego Pérez Retes (Bilbo, 1978) aktore ezagunaren dramaturgia eta zuzendaritzarekin eta Mikel Losada, Leire Orbe, Josu Angulo Anthonisen, Leire Ucha, Aratxo Angulo eta Iñaki Urrutiak osatutako taldearekin. Abuztuaren 17an, igandea, izango da estreinaldia, eta Aste Nagusiko azken egunera arte (hilaren 24a, igandea) egongo da kartelean. Sarrerak salgai daude jada eta 25 euroko prezio bakarra dute (azken prezioa).
