Etxe Betea proiektuak emakume zinemagileentzako egoitza-programen deialdi berriak abiarazi ditu: "Gela bat norberarena", "Elkarrekin sortzen", "A shelter of one's own", "Two week international residency". Deialdi guztiak abuztuaren 25era arte egongo dira zabalik. Interesdun bakoitzak proiektu bera aurkeztu ahal izango du gaur egun irekita dauden deialdi batean edo gehiagotan, betiere deialdi bakoitzean ezarritako hautagarritasun-baldintzak betetzen baditu.

Etxe Betea programaren deialdietan parte hartzeko behar den dokumentazioa berbera izango da deialdi guztietan. Hurrengo inprimakian entregatuko da, eta aldi berean deialdi bat baino gehiago hautatu ahal izango dira.

GELA BAT NORBERARENA

Etxe Beteak "Gela bat norberarena" egoitza artistikoaren seigarren edizioa deitu du, Virginia Woolfen inspiratutako proiektua. Bertan, emakume zinemagileek beren film luzeak egingo dituzte 2025eko urritik 2026ko ekainera bitartean. Aurtengo edizioan bi emakumek parte hartuko dute, aurreko deialdietan Naiara Carmona, Estibaliz Urresola, Ainhoa Rodríguez, Mikele Landa, María Herrera, Naia Arantzamendi eta Tamara Lucarinirekin gertatu zen bezala.

Egoitza batean, proiektua euskaraz duen zinemagile bat egongo da, eta beste batean, proiektu bat beste edozein hizkuntzatan (gaztelania, katalana, galiziera, aranera, valentziera, ingelesa, eta abar). Egoiliar bakoitzak gela fisiko propioa izango du Bilboko eraikinik esanguratsuenetako batean, eta 5.000 euroko laguntza ekonomikoa. Bi egoiliarrek beren proiekturako egokiena iruditzen zaien aholkularia proposatu ahal izango dute, eta Etxe Betea taldeak proposamen horiek ebaluatuko ditu eta, ondoren, egoitza bakoitzarekin batera joango den aholkularia berretsiko du.

Egoiliarrak hilean behin bilduko dira beren aholkulariekin. Behin hautatuta, artistek bertaratzeko konpromisoa sinatu beharko dute, eta bertaratu egingo dira aste hauetan: 2025eko azaroaren 24tik 28ra, 2026ko martxoaren 9tik 13ra eta 2026ko ekainaren 8tik 12ra.

Gariza Filmsek sortutako Una Habitación Propia proiektua Basque Know Howek bultzatu du eta BBKren eta Bilboko Udalaren babesa du.

Egoitza artistikoak edozein adin, nazionalitate eta esperientziatako emakumeei zuzenduta daude, baldin eta hasierako garapen-fasean film luzearen proiektuaren ideia badute. Ikastaroa hiru blokek osatzen dute. Lehenengoa, sortzaileek aukeratutako gaiak ikertzea izango da. Bigarren multzoaren helburua tratamendu-bertsio bat, gidoia edo antzekoa sortzea izango da, proiektu bakoitzaren beharren arabera. Hirugarrenaren helburua proiektuaren bideragarritasun ekonomikoa egiaztatzea eta proiektu bakoitzerako ekoizleak edo laguntzaileak bilatzeko estrategiak baloratzea izango da. Egoitza horretan, parte-hartzaileei laguntza feminista emango zaie.

A SHELTER OF ONE'S OWN

Etxe Beteak "A shelter of one's own" nazioarteko arte-egoitzaren lehen deialdia egin du, gatazka armatuan, errepresio politikoko testuinguruan, adierazpen askatasunik eza nahiz zinematografia-ekoizpenerako azpiegitura eta laguntza eskasean dagoen herrialde batetik datorren emakume zinemagile batek egindako film luze bat garatzen laguntzeko. Proiektua edozein hizkuntzatan landu daiteke. Hala ere, egoitza barruan izanen den garapen-prozesua eta behar izanen den dokumentazio guztia gaztelaniaz edo ingelesez aurkeztu beharko da.

Egoitzaren helburu nagusia da jatorriagatik edo gaiagatik gauzatzeko oztopoak dituzten zinematografia-proiektuak garatzeko ingurune segurua, librea eta egokia eskaintzea. Ikus-entzunezko lana garatzeko zailtasun estrukturalak, sozialak edo instituzionalak dituzten sortzaileei zuzenduta dago. Xedea du haien ahotsak babestea, baliabide zehatzen eta laguntza profesionalaren bidez.

"A shelter of one's own"-ek honako hauek eskaintzen ditu: 5.000 € zinematografia-proiektua garatzeko, 9 hilabeteko ostatua Bilboko eraikin enblematikoenetako batean eta hileko mentoretzak eta aurrez aurreko topaketak Etxe Betean.

Ekimen honen bidez, "A shelter of one's own"-ek zineman ahotsen aniztasuna, kultura-eskubideen defentsa eta sormen-askatasuna sustatzen ditu, sektorearteko ikuspegiarekin eta gizarte-justiziarekin, feminismoarekin eta giza eskubideekin konprometituta.

TWO WEEK INTERNATIONAL RESIDENCY

"Two week international residency" izeneko programak nazioarteko zinemagile bat hartuko du bi astez, film luzeen proiektu bat garatzeko. Egoitza Bilbon izanen da eta ostatu eskaintzen du bi astez; Etxe Betearen barruan lan egin ahal izateko eta sektoreko emakume profesional batekin mentoretzak jasotzeko gunea. Aurrez aurreko bi asteak otsailean edo maiatzean izan daitezke.

Lehenengo edizioan, Thessaloniki-ko (Grezia) Nazioarteko Zinemaldiaren eta Neela Asmaan (Pakistan) arte-egoitzaren arteko trukea egin zen. Alkisti Efthymiou zinemagile greziarra bi astez egon zen Etxe Betean, eta bertan Alba Cros-en mentoretza jaso zuen. Ondoren, Mikele Landa euskal zinemagilea Greziara joan zen Evia Film Project-en parte hartzeko.

Horrekin batera, Neela Asmaanekin lankidetzan, Tamara Lucarini zinemagilea Pakistanera joango da eta bi astez egonen da egoitza batean. Jarraian, Pakistango artista bat hartuko dute bi astez Etxe Betean.

Deialdi hau Espainian bizi ez diren adin eta esperientzia-maila guztietako emakume zinemagileei zuzenduta dago. Zinemagile bakarra hautatuko da egoitzaren edizio honetan parte har dezan.

Film luzeko proiektu bat (fikziozkoa, dokumentala, esperimentala, animaziozkoa nahiz hibridoa) garatzen ari diren zinemagileek parte har dezakete, zinematografia-generoan eta prozesuaren etapa zehatzean (idazketa, garapena edo aurre-produkzioa) murrizketarik izan gabe.

ELKARREKIN SORTZEN

"Elkarrekin sortzen"-en laugarren deialdia kaleratu du Etxe Beteak. Zinegileen lantalde horrek honako hauek hartu dute parte: Naiara Carmona, Lara Izagirre, Mikele Landa, Tamara Lucarini, Nerea Sciarra, Tessa Andonegi, Ainhoa Aierbe, Naia Arantzamendi, Itxaso Díaz, Maitane Carballo, Itziar Lamarka, Sara Martorana, Lucía Montero, Aizpea Atxa, Estibaliz Maguregi, Estibaliz Curiel, María Monreal, Mònica Cambra, Soledad Santelices, Yolanda García eta Sonia Estévez.

Ekimen honen laugarren edizioak hilero beste zinemagile batzuekin topaketak, euskal ikus-entzunezkoen industriarako proiektuen pitching saio bat eta ekainean Bizkaiko landetxe batean lan intentsiboko aste bat biltzen ditu. Bi lantalde independente sortuko dira: Elkarrekin Sortzeneko talde bat euskaraz eta beste bat gaztelaniaz.

Topaketen egutegia honako hau izango da: 2025eko urriaren 22an, azaroaren 26an eta abenduaren 17an; 2025eko urtarrilaren 28an, otsailaren 25ean, martxoaren 25ean, apirilaren 22an, maiatzaren 20an eta ekainaren 8tik 12ra.