"Ikusi eta ikasi" 2020

Bilbao 2020(e)ko urtarrilaren 31(e)tik 2020(e)ko maiatzaren 22(e)ra
  • "Ikusi eta ikasi" 2020

"Ikusi eta ikasi" 2020 [PDF - 6,31 MB]
"Lagun artean" 2020 [PDF - 10,4 MB]

Aurten, lehenengo bider, "Ikusi eta ikasi" programak bi kategoria izango ditu: 'Familian', 4 eta 8 urte bitarteko umeentzat, eta, berrikuntza gisa, 'Lagun artean', 8 eta 10 urte bitarteko umeentzat.

"Ikusi eta ikasi" programa ezaguna da Bilbon. Uriko familien artean izan duen arrakasta dela-eta, aurten, berrikuntza gisa, 'Lagun artean' formatua sortu da, 8 eta 10 urte bitarteko neskato-mutikoentzat. Kategoria honetan, taldean olgatuko dira umeak, eta helduek lagundu gabe parte hartuko dute lantegietan, adiskideekin. Era horretan, Ikusi eta Ikasi programak zabaldu egingo du orain arte eskainitako adin-tartea, eta era gehiagotako lantegiak eskainiko ditu, txikienek ere lekua izan dezaten.

Doan eskainiko diraurtarriletik maiatzera, guztira 75 jarduera, arlo batekoak eta bestekoak, lantegi nahiz ikuskizun formatuetan. Zehazki, 30 ikuskizun eta 35 lantegi izango dira, 'Familian' kategoriakoak, eta beste 10 lantegi 'Lagun artean' kategoriakoak.

Ekimen honen helburua da ondo pasatuz euskararen erabilera bultzatzea ume bilbotarren artean, aisialdian erabil dezaten, modu dibertigarrian, kulturaren bidez hezkuntza sustatuz eta kalitatezko programazioa eskainiz.

Bilboko Udalak, Euskaltzaleen Topagunearekin batera (Euskararen aldeko kultur elkarteen federazioa), berriro ere eskainiko ditu umeentzako ikuskizunik onenak euskaraz, Bilboko barruti guztietan. "Ikusi eta ikasi" programa, aurten, 15 auzotara eta 11.000 familiarengana iritsiko da.

Urtarrilaren 31n (barikua), 18:00etan abiatuko da "Ikusi eta ikasi" programa Errekalde auzoan, Eidabe konpainiaren Meri, Mari eta Lari ikuskizunarekin, eta maiatzaren 22an amaituko da, Indautxuko El Carmen aretoan, Irrien Lagunen Irrien Taupadak ikuskizunarekin.

Ikuskizunak doakoak dira. Sarrera librea izango da leku guztiak bete arte, baina, parte hartzeko, izena eman behar da aldez aurretik lantegietarako, web-orriko inprimaki batekin: www.ikusietaikasi.eus. Hala, zozketa egin da eskabide guztien artean.

Lantegi eta ikuskizun guztiak euskaraz izango dira. Guztira, 75 jarduera dira, Bilboko barruti guztietan barreiatuak, aisialdia, kultura eta hezkuntza batzen dituztenak. Urtarrilaren 31tik aurrera (barikua), Bilboko 15 auzoetako udaltegietan izango dira: Errekalde, Basurtu, Santutxu, Begoña, Deustu, Abando, Zorrotza, Castaños, Euskararen Etxea (San Inazio), Indautxuko El Carmen aretoa eta Juan Delmas, Tiboli eta Iruarteta ikastetxeetan.

Jardueren artean, Bilboko umeek aukera izango dute antzerkia, ipuin kontalariak, dantza, zirkua, magia eta musika gozatzeko.

4 eta 8 urte bitarteko neskato-mutikoentzat, Ikusi eta Ikasi Familian atalean, lantegi hauek eskainiko dira:

  • CONTACT-KIDS. Familia barruan ukipenaren bidez komunikazioa hobetzeko metodologia bat da, gurasoen eta txikienen arteko konfiantza hobetzen laguntzen duena.
  • SERIGRAFIA. Serigrafiaren teknika ikasiko dute, beharrezkoak diren tresnak eta lanabesak ezagutuz.
  • MUSIKA TRESNA BIRZIKLATUAK. Kolore biziekiko marakak sortuko dituzte, koloreak eta erritmoa nahastuz. Orobat, DEN DEN DAIKO musika tresna japoniarra eraikiko dute: danbor bat da, bi alde dituena eta soinu sakon bat sorrarazten duena.
  • MOZORRO MITOLOGIKOAK. Mozorro mitologikoak sortzen dituzte eva gomarekin, kartoi mehearekin eta era bateko eta besteko gaiekin.
  • MUSIKOTERAPIA. Familia osoak gozatu ahal izango du esperientzia pedagogiko, olgetazko eta dibertigarri hau, musikoterapeuta profesional baten eskutik.
  • IPUIN KONTALARIAK. Lantegi honetan, familiek ipuinak euskaraz kontatzen ikasiko dute, eta, gainera, helduak eta umeak elkarrekin jardungo dira orriak markatzekoak egiten.

8 eta 10 urte bitarteko neskato-mutikoentzat, Ikusi eta Ikasi Lagun artean atalean, lantegi hauek eskainiko dira:

  • PIXILAZIO tailerra. Jolasaren bidezko animazio-tailerra. Stop Motion teknikaren bitartez, argazkiz argazki, gure animazioa osatuko dugu.
  • ZIRKU-tailerra. Gorputzaz jabetzen ikasiko dute tailer honetan. Akrobaziak egingo dituzte, hala banan-banan nola binaka.
  • SORTU ZEURE FANZINEA lantegia. Marrazketa, margoketa, estanpazioa, collagea eta beste teknika plastiko batzuk baliatuz fanzineak sortuko ditugu.
  • BITXIGINTZA LABEAN lantegia. Bitxigintzako pieza bat egingo dute beroaren eraginez txikitzen den lamina batekin.
  • NEON MARGOA lantegia. Aurpegia eta gorputza margotuko dute neon margoekin.
  • TXANTILLOIAK lantegia. Grafftiaren oinarriak ikasi eta norbere txantiloiak egiteko aukera izango dute.

Jarduera guztiak 18:00etan hasiko dira, salbu eta zapatu goizetarako antolatuak, 12:00etan hasiko dira-eta.

Lantegiak, berriz, 18:00etan hasiko dira, baldin eta saio bakarra eskaintzen bada; egun berean bi saio eskaintzen badira, lehena 17:15ean izango da, eta bigarrena 18:30ean.

Programan parte hartzen duten pertsonek balorazio-orria bete badute, zozketa bat egingo da maiatzaren 15ean, eta programako amaierako ikuskizuna egingo den egunean, maiatzaren 22an, euskarazko hiru produktu eta jokoz osatutako sorta bana entregatuko zaie zozketan egokitzen zaien pertsonei.

"Ikusi eta ikasi" programa Bilboko Udalaren Euskararen Garapenerako Ekintza Planaren helburuetan dago oinarrituta (EGEP), alegia: hizkuntza transmititzea, kalitatea eta zerbitzua.

"Ikusi eta ikasi" programak 16 urte bete ditu jadanik, 2005ean hasi zenetik, Bilboko umeek denbora librean euskara modu dibertigarri baten erabil dezaten sustatzeko. Iazko edizioan Ikusi eta Ikasi programak 4000 pertsona batu zituen eta magiaz, musikaz, antzerkiaz, dantzaz eta abarrez gozatu ahal izan zuten.

Bilboko Udala

Laburrean

  • Mota Haur jarduera
  • Data 2020(e)ko urtarrilaren 31(e)tik 2020(e)ko maiatzaren 22(e)ra
  • LekuaBilbao

  • ZenbatekoaDoan
  • HizkuntzaEuskara

Non

Euskadi, auzolana