Bilbao Bizkaia Design Week 2020

Bilbao 2020(e)ko azaroaren 19(e)tik 2020(e)ko azaroaren 26(e)ra
  • Bilbao Bizkaia Design Week 2020

Bilboko Udalak eta Bizkaiko Foru Aldundiak sustatuta, sormen-industriaren sektoreko enpresen Euskadiko topaketarik handiena da Bilbao Bizkaia Design WeekAzaroaren 19tik 26ra bitarteanberrogeita hamar jarduera inguru egingo dira guztira, besteak beste, erakusketak, solasaldiak, bisitak, jaialdiak eta hitzaldiak.

Aurtengo edizioaren izenburua honako hau izango da: "Enpatia. Aldatzen den mundu bat birdiseinatzea", eta gaur arte antolatu den ediziorik birtualena izango da, diseinuaren astea koherentea izan dadin egungo testuinguruarekiko. Modu horretan, pandemiak sektorean eragindako inpaktuaren gaineko hausnarketa bat planteatuko da, bai eta sormen-industriek etorkizunean izan beharko duten eginkizunari buruzkoa ere.

Bilbao Bizkaia Design Week (BBDW) astearen aurtengo edizioa azaroaren 19an hasiko da, 18:00etan, "Enpatiatik abiatuta hibridatzea" izeneko irekiera-ekitaldi batekin. Hala, arreta jarriko da diseinuaren eta kultura- eta sormen-industrien balioan, beste sektore estrategiko batzuentzako berrikuntza-tresna diren aldetik.

Zortzi egunez, Bilboko Udalak eta Bizkaiko Foru Aldundiak, enpresa pribatu, unibertsitate, kluster eta elkargo profesionalen lankidetzarekin, eztabaida bat sustatuko dute Enpatiaren kontzeptuaren bitartez sormen-industrien esparrua birdefinitu, birdiseinatu eta birpentsatzeari buruz. Bilbao Bizkaia Design Week (BBDW) astearen asmoa da hausnarketa horretan sakontzeko aukera ematea, diseinuak eta sormenak duten garrantzia nabarmenduz.

Hori dela eta, aurtengo BBDW20 edizioak ENPATIA izango du hizpide. Enpatia, mundu justuago eta jasangarriago bat berreraikitzeko jarrera gisa. Enpatia, gure artean erlazionatzeko moduak birdefinitzen lagunduko digun printzipio gisa. Elkar eragiteko gailuak, interfazeak eta tresnak nahiz ekoizten ditugun produktuak eta zerbitzuak birdiseinatzen laguntzeko printzipio gisa. Gure balio-, zaintza-, mugikortasun-, ekoizpen-, eta bizi-sistemak, bai eta gure bizikidetza-, kultura- eta aisialdi-formak ere, birpentsatzeko printzipio gisa.

Testuinguru horretan, sormenaren sektoreko profesionalei zein herritarrei etorkizunera begiratzeko aukera emango zaie sormenarekin zerikusia duten hainbat diziplinatatik: arkitektura eta hirigintza, artea, artisautza, ikus-entzunezkoa, diseinua, ilustrazioa, interiorismoa, moda, publizitatea, komunikazioa eta bideo-jokoak. Edizio honetan egingo diren jardueretan parte hartu nahi izanez gero, egitaraua eskuragarri dago webgune honetan: www.bilbaobizkaiadesignweek.eus.

Bilboko Udalak eta Bizkaiko Foru Aldundiak bi helburu nagusi betetzeko antolatu dute Bilbao Bizkaia Design Week (BBDW) ekitaldia: alde batetik, diseinua sustatzea jarduera ekonomikoa nahiz enplegu kualifikatua sortzeko gaitasuna daukan sektore gisa, eta, bestetik, lurraldeko sormen-industriek daukaten balioa agerraraztea. Guztira, 5.923 enpresa inguru dira eta 19.899 profesionali ematen diete lana Bilbon nahiz Bizkaian. Azken hamarkadan etengabe hazi den sektorea da. Sektore honetako enpresen hazkundea azken urtean % 1,23koa izan da, eta esparru honetan enplegua % 0,47 hazi da. Sormen-sektoreko enpresak Bizkaiko enpresa guztien % 6,5 dira, eta lurraldeko enpleguaren % 4,4 hartzen dute.

Erakundeen arteko proiektu bat da Bilbao Bizkaia Design Week (BBDW), eta hirian zein lurraldean errotuta dago; bidenabar, diseinu eta sormen-industrietako 300 enpresa eta profesional baino gehiagok hartzen dute parte.

BERROGEITA HAMAR JARDUERA INGURUK OSATUTAKO ASTEA

Bilbao Bizkaia Design Week (BBDW) astearen ediziorik birtualenak berrogeita hamar jarduera inguru eskainiko ditu, ahal dela online egingo direnak. Hona hemen jarduerarik nabarmenenak:

- Opening (azaroaren 19an, 18:00etan)

Bi esperientzia aurkeztuko dira, non industria, iraunkortasuna, diseinua eta sormena hibridatu diren, planetarentzat eta pertsonentzat irtenbide berritzaileak eta enpatikoak lortzeko. Horrez gain, kultura- eta sormen-industrien eta euskal ingurumen-sektorearen arteko lankidetza- eta sorkuntza-esperientzia bat aurkeztuko da, Aclima klusterrak ordezkatutakoa, hain zuzen ere, BBDW20 astearen ondoren martxan jarriko dena. Jardunaldi hori streaming bidez baino ezingo da jarraitu, COVID-19aren ondoriozko osasun-krisiak eragindako murrizketa bereziak direla eta.

- Kultura eta sormen topaketak. (azaroak 23, 17:00etan)

Kultura eta Sormen Topaketen bigarren edizioan honako hau izango dugu hizpide: egungo osasun-krisiak nola eragin dien “espazio publikoan” gertatzen diren adierazpen kulturalei. Eztabaidagune bat egongo da, eta bertan parte hartuko dute sormen- eta kultura-sektoreak sustatzeko asmoz bat egin duten udalerrietako eta eskualdeetako sormen- eta kultura-ekimenen esperientziek, zeinak GARAPENen babespean eta INNOBASQUEren laguntzarekin egin diren.

- URBANBAT (urriak 29 – azaroak 21)

Hirien eraldaketari buruzko ikerketa-prozesuetan zentratutako jaialdi bat da URBANBATfest. Hiriak berritzeko prozesuak sustatzeko helburua duen ikasketa-, esperimentazio- eta sormen-ingurune bat da. Aurtengo edizioaren izenburua “Etxe barruan hiria” izango da, eta etxebizitzek, larrialdi planetarioari aurre egiteko “gudu-zelai” nagusi izatera igaro diren heinean, izan duten bilakaera jorratuko da. Hainbat diziplinetako adituak eta herritarrak deitu dira, “etxetik ibiltzeko moduko” esperimentu kolektibo batean parte har dezaten. Etxeak laborategi bihurtu dira eta, bitartean, etxegabeek ikusezin izateari utzi diote.

- Selected from Bilbao (azaroak 20 eta 21, 09:00etatik aurrera)

Sormen-industrietako diseinatzaileek, sortzaileek eta artistek bi egunez jarraian parte hartzeko ekitaldi bat da Selected. Maila handiko hitzaldiak eskainiko dira eta hausnartzeko espazio bat ere sortuko da, sormenaren eta diseinuaren hainbat diziplinen inguruan hitz egiteko. Selected-en helburua da inspirazio bisuala biltzea eta partekatzea, bai eta sortzaileen arteko komunitatea babestea eta aktibatzea ere. Bestalde, diseinuaren gaur egungo joerak partekatu nahi dira kultuaren eta industriaren panoraman interesa duten pertsona guztiekin.

- Euskal Diseinuaz (azaroak 23, 18:00etan)

DendAZ proiektuan parte hartzen duten artistek eta diseinatzaileek egindako proiektuen aurkezpenen eta elkarretaratzeen agenda bat da.

- FIG BILBAO (azaroak 26 - 29)

FIG Bilbao, Paper gaineko artearen eta grabatuaren nazioarteko azokak, azaroaren 26tik 29ra bitartean egingo du bederatzigarren edizioa, birtualki, plataforma berri honen bidez: www.figonlinefair.com.

- Mundua aldatzeko ekintzailetza enpatikoa (azaroak 24, 12:00etan)

Bilbao Metrópoli 30 elkarteak antolatuta, mahai-inguru bat egingo da hiru enpresarekin, zeinek sormen-ekonomiaren arloan ekimenak sustatu dituzten, eskaintzen duten produktuan edo zerbitzuan osagai enpatiko esanguratsua jarrita.

- Open Studio Bilbao Getxo (azaroak 23 - 25)

Bilboko eta Getxoko diseinu-estudioak ezagutzeko hiru bisita birtual. Bilbon hiru ibilbide desberdin egingo dira eta ibilbide bakarra Getxon.

- Janztearen artea. Mercedes de Miguel. (azaroak 19 – otsailak 28)

Gueñesko Basque Design Centerrek erakusketa bat antolatu du, pieza esanguratsuenen aukeraketa baten bidez firmaren 30 urteetako ibilbidea erakusteko. Atzoko eta gaurko jantziek elaborazio-prozesuak erakutsiko dizkigute, artisautzaren mundura hurbilduko gaituztenak.

- Closing Conference. Mundua birdiseinatuz (azaroak 26, 10:00-12:00)

Aurtengo Bilbao Bizkaia Design Week (BBDW) ekimenari amaiera emateko, birpentsatzeko, birdiseinatzeko eta berreraikitzeko jardunaldi bat egitea proposatu da. Inspirazio-jardunaldi bat izango da eta, hasteko eta behin, gizarte gisa aurre egin beharreko erronkak identifikatuko ditugu. Horretarako, honako hauen parte hartzea izango dugu: alde batetik, Daniel Innerarity, filosofia politiko eta sozialeko katedraduna, Ikerbasque ikertzailea EHUn eta Europako Unibertsitate Institutuko irakaslea Florentzian, eta, bestetik, Raquel Pelta, diseinuaren historialaria, Bartzelonako Unibertsitateko irakaslea eta Monográfica diseinu-aldizkariko zuzendarikidea. Halaber, jardunaldi honetan gure inguruko enpresen esperientzia zehatzak azalduko dira, zeinak sormen-sektoreetatik abiatuta erronka horiei (zaintza, osasuna, hezkuntza, mugikortasuna) aurre egiteko irtenbideak proposatzen ari diren.

Bilboko Udala

Laburrean

  • Mota Bestelakoa
  • Data 2020(e)ko azaroaren 19(e)tik 2020(e)ko azaroaren 26(e)ra
  • LekuaBilbao

Non

Euskadi, auzolana