Kortxeak & Krispetak 2021

Vitoria-Gasteiz 2021(e)ko uztailaren 7(e)tik 2021(e)ko uztailaren 30(e)ra
  • Kortxeak & Krispetak 2021

Kortxeak & Krispetak zikloaren edizio berri bat martxan da Oihanederren. Hiru film eta kontzertu bat izango dira egitarau honen baitan eskainiko ditugunak: filmak uztaileko asteazkenetan izango dira eta kontzertua, berriz, uztaileko azken ostiralean. Aurreko urtean bezala, filmak Ortuño aretoan emango dira, pandemiaren osteko egoerara egokituta oraindik ere. Kontzertua, aldiz, Falerina lorategian egingo da. Zikloa Laboral Kutxak babestu du beste behin, eta Filmazpitekin batera antolatu da.

Badira zazpi urte Oihaneder musika eta musikariei lotutako dokumentalak eskaintzen hasi zela, Kortxeak & Krispetak zikloaren baitan. Eta aurten ere udako hiru iluntzetan hiru musika-dokumental eskainiko ditu. Zikloa borobiltzeko, berriz, 2020an aurrera atera ez zen kontzertu  emanaldia izango da.

Kortxeak & Krispetak uztailaren 7an hasiko da, asteazkenero (uztailaren 14 eta 21ean izango dira beste bi filmak), iluntzeko 19:00etan, musikari edo musika talde ezberdinei buruzko filmak eskainiko ditu. Kontzertua, berriz, uztaila amaiera izango da, uztailaren 30ean, ostiral iluntzean, 20:30ean.

Datak ez ezik, emanaldiak egiteko espazioak ere egokitu behar izan dira. Izan ere, egoerak eskatzen dituen segurtasun baldintzak bermatzeko, film guztiak Ortuño aretoan izango dira. Kontzertua, aldiz, Falerina lorategian egingo da.

Esan bezala, zikloa uztailaren 7an hasiko da Ivan Castellek zuzendutako The Rise Of The Synths filmarekin. Synthwave (Outrun edo Retrowaveere deitua) izeneko eszena musikal baten sustraietara egiten du bidaia filmak. Musika elektroniko modernoaren eta 80ko hamarkadako pop kulturaren nostalgiaren arteko nahasketa ageri da bertan. Azken urteotan, Interneteko foroetan joera diskretu bat izatetik, sare sozialetan milioika erreprodukzio dituen azpikultura bat izatera pasa da, mainstreamean eragin geldiezinarekin. John Carpenter ikonikoak kontatua, filmak nostalgia eta musika, sormen prozesuak eta erreferentzia kulturalak, berjabetzea eta bidezko sorkuntza uztartzen ditu.

Uztailaren 14an jarraituko du zikloak Danny Garciaren STIV filmarekin. Stiv Bators-en bizitzaren errepaso sakona egiten du filmak, Cleveland, New York, Londres eta Paris ardatz nagusi gisa hartuta; izan ere, sexu, droga eta dezibelio bidezko rock ‘n’ roll bizimoduaren debozio itsuak markatutako punk rock amerikarraren estandartea da berau. Bere idoloen (Alice Cooper, Iggy Pop, Jim Morrison) balentriak errepikatzeko grina eta irudi publiko basati eta autosuntsitzaile batek nortasun samurra, ahula eta haur-izaera ezkutatzen zituen. Dokumentalak berarekin jo zutenen ahotsak biltzen ditu, glam, punk, eta rock gotikoaren izen handien desfilea bilakatuz, Generation X, The Clash, Sham 69 edo Barracudas bezalako taldeekin.

Hirugarren eta azken filma uztailaren 21ean eskainiko da: sare sozialetan erabiltzaileek aukeratutako Searching for Sugar Man filma, hain zuzen ere. 60ko hamarkadaren amaieran, Sixto Rodriguez, musikari misteriotsu bat, Detroiteko taberna batean bere doinu hunkigarriekin eta bere letra profetikoekin liluratuta geratu ziren bi ekoizlek aurkitu zuten. Bi disko grabatu zituzten, artista bere belaunaldiko handienetakoa bihurtuko zela sinetsita. Hala ere, arrakasta ez zen inoiz iritsi, eta abeslaria desagertu egin zen bere buruaz beste egitearen inguruko zurrumurruen erdian. Bien bitartean, diskoetako bat apartheid-aren Hegoafrikara iritsi zen eta herrialde osoan zehar zabaldu zen grabazio piratetan, Rodriguez askatasunaren eta sistemaren aurkako borrokaren ikur bihurtu zuena. Handik denbora luzera, Hegoafrikako bi jarraitzaile Rodriguezekin zer gertatu zen jakin nahian ibili ziren, eta euren ikerketak aparteko istorio bat ezagutzera eraman zituen.

Kontzertuari dagokionean, berriz, Dupla ezagunak izango dira zikloari amaiera emango diotenak uztailaren 30ean, iluntzeko 20:30ean. Falerina lorategian aurkeztuko dute Mundua geldi egitasmoa. Nekazal ingurune batean musika urbanoa egiten duen taldea da. Hitz esplizituak erabilita, ikutu elektronikoa zein hip-hop-a nahasten dituen pop musika da beraien marka. Aguraineko bikote honek, hilean behin ateratzen zituzten ikus-entzunezko kapituluak Youtuben partekatuz, beraien lehenengo EP-a egiten hasi ziren 2018ko neguan. Zuzenekoetan, ahotsa zein bateria, elektronikaren indarrarekin nahasi eta antzerkiaren antza duen espektakulu bisuala sortzen dute.

Filmazpit-ekin elkarlanean, hiru filmak jatorrizko bertsioan proiektatuko dira, euskarazko azpitituluekin.

Ekimenak Laboral Kutxaren babesa du.

Horrez gain, azpimarratzekoa da jarduera guztiak doakoak izango direla, baina edukiera mugatua izango denez, gonbidapenak aurrez hartu beharko direla astebeteko aurrerapenaz eta ohiko bideak erabilita.

Informazio gehiago:


Laburrean

Non

Euskadi, auzolana