Donostia zinemaldia 2021

Donostia-San Sebastián 2021(e)ko irailaren 17(e)tik 2021(e)ko irailaren 25(e)ra
  • Donostia zinemaldia 2021

Irailaren 17tik 25era bitartean Donostia Zinemaldiak bere 69. edizioa egingo du.

Sail Ofizialean, mundu osoko hainbat film lehiatuko dira Urrezko Maskorra lortzeko, eta New Directors sailean, berriz, hainbat nazioarteko zinemagilek hartuko dute parte haien lehen edo bigarren filmekin. Horizontes Latinos sailean Latinoamerikako film luzeak lehiatuko dira eta Perlak atalean beste nazioarteko jaialdietan txalotutako lanek Donostia Hiria Publikoaren saria irabazteko aukera izango dute. Zabaltegi-Tabakalera sail irekiena, gastronomiarekin lotutako Culinary Zinema, euskal zinemari eskainitako Zinemira eta urteko film espainiarren erakustaldia den Made in Spain ere izango dira. Gainera, iaz pandemia dela eta bertan behera geratu ziren Klasikoak saila eta Koreako zinemaren urrezko aroari buruzko atzerabegirakoa berreskuratuko ditu Zinemaldiak.

Hamazazpi lanek –hamahiru film luzek, film labur batek, telesail batek, ekoizpen-fasean dagoen film batek eta proiektu batek– osatuko dute Donostia Zinemaldiaren 69. edizioko euskal partaidetza, eta Sail Ofizialean, Zabaltegi-Tabakaleran, Zinemiran, Euskal Zinemaren eta EiTBren galetan, WIP Europan eta Ikusmira Berriak sailean banatuta egongo dira.

Zinemira, euskal zinemari berariaz eskainitako saila, Donostia Zinemaldiak eta Eusko Jaurlaritzako Kultura Sailak antolatzen dute, Irizar eta EiTBren babesarekin eta Euskadiko Filmategiaren, EPE/APV eta IBAIA ekoizleen elkarteen eta Zineuskadiren laguntzarekin. Aurtengo edizioan, Zinemirak fikziozko eta ez-fikziozko hamaika lan izango ditu. Horietako zazpi Zinemaldian mundu-estreinaldiak izango dira eta, horregatik, Euskal Zinemaren Irizar Saria lortzeko aukera izango dute, Zinemaldiaren beste atal batzuen parte izango diren beste bi lanekin batera. Horrela, bederatzi ekoizpen lehiatuko dira, guztira, 20.000 euroko saria eskuratzeko filmaren ekoiztetxerako edo ekoiztetxeetarako.

Javier Corcuerak (Lima, 1967) Goya bat jaso du, baita Zilarrezko Biznaga bat Málagan eta Fipresci epaimahaiaren aipamen berezi bat Donostian ere La espalda del mundo (Zabaltegi-New Directors, 2000) filmagatik, eta No somos nada / We Are Nothing filmarekin itzuliko da Zinemaldira, La Polla Recordsen −Evaristo Páramosek zuzendutako punk-talde historikoaren− agur-biraren inguruan sorturiko ez-fikziozko filma.

Maru Soloresek (Donostia, 1968) Camera obscura (Zinemira, 2012) obrarekin egin zuen debuta film luzeen zuzendaritzan, eta Aztarnak – Huellas / Imprints lanaren –bere bigarren film luzearen– estreinaldiak itxiko du Zinemira oraingoan. Dortoka uhartea (La isla de la Tortuga, 2002) film labur sarituaren egilearen film berrian haurtzaroko urteek uzten dizkiguten eta gogoratzen ez ditugun aztarnei buruzko hausnarketa egiten da.

Iñaki Alforja (Iruñea, 1967) eta Iban Toledo (Beasain, 1978) zinemagileek Bolante baten historia / Story of a Steering Wheel zuzendu dute, José Miguel Etxeberria Álvarez Naparra desagertu zeneko eta haren familiak haren gorpuaren bila emandako 40 urteri buruzko ikerketa bat, hain zuzen.

El radioaficionado / The Radio Amateur Iker Elorrietaren (Bilbo, 1977) fikziozko lehen film luzea da; besteak beste, I Forgot Myself Somewhere (2017) ez-fikzio sarituaren egile da Elorrieta, eta ama hil ondoren jaioterrira itzuliko den hogeita hamar urteko gazte autista bat ekarriko digu oraingoan bere film berriarekin.

Xabier Erkizia (Lesaka, 1975) soinu-artista, musika-ekoizle eta ikertzaileak, Converso (2017) eta Urpean lurra (2019) euskal ekoizpenen soinu-arduradunak, O Gemer / The Moaning filmarekin egin du debuta errealizadore gisa, idi-gurdiek egiten duten soinu bitxian oinarritutako film esperimental batekin, hain zuzen.

Maider Oleagak (Bilbo, 1976) hainbat film proiektatu izan ditu Zinemaldian, tartean Muga deitzen da pausoa / Stepping into the Boundary, Ikusmira Berriak egonaldi-programaren lehen edizioan garatu zuen proiektua, hain zuzen ere. Oleagak Kuartk Valley estreinatuko du aurtengo Zinemaldian, Arabako haran bateko herri batean bertako jendeak lagunduta filmatutako western baten istorioa.

Hernán Zinek (Buenos Aires, 1971), Nacido en Gaza (2014), Nacido en Siria (2016) eta Morir para contar (2018) saritutako lanen egileak, Belako musika-taldeari jarraitu dio 2020an zehar: 60 kontzertu bertan behera utzi zituztenetik pandemia-testuinguruan euren burua berrasmatu behar izan zutenera arte (bira bat egin zuten drive-inetan). Pandemic Tour 2020 Belako filmak Josu Ximun Billelabeitia, Lore Nekane Billelabeitia, Cris Lizarraga eta Lander Zalakain musikagile eta Mungiako musika-taldeko kideen ibilbideari jarraituko dio.

Euskal Zinemaren Galan estreinatuko da Hondalea, Asier Altunak (Bergara, 1969) zuzendutako ez-fikziozko filma, Cristina Iglesias artistak Donostiako Santa Klara uharterako sortu duen obraren inguruan. Altuna Zinemaldian izango dugu, berriz ere, Amama (Irizar Saria, 2015) filmarekin Sail Ofizialean lehiatu ondoren eta Bertsolari (2011) lehiaketaz kanpo erakutsi ostean; halaber, New Directors sailean eta Euskal Zinemaren Galan ere egon izan da Altuna, hurrenez hurren, Aupa Etxebeste! (2005) eta Agur Etxebeste! (2019) ¿biak Telmo Esnalekin batera zuzenduak¿ aurkezten. Iaz Culinary Zinema saila inauguratu zuen ARZAK Since 1897 ez-fikziozko filmarekin.

Gainera, Maixabel Euskal Zinemaren Irizar saria irabazteko lehian izango da. Sail Ofizialean egongo da Icíar Bollainen (Madril, 1967) filma; ETAk eraildako Juan Mari Jáuregui buru sozialistaren alarguna antzeztu du Blanca Portillok bertan, eta Luis Tosarrek, berriz, atentatuaren arduradunetako baten papera egin du. 2011n Langraiz bidea deritzonaren bidez bultzatutako konpontze-topaketak irudikatu ditu zuzendariak Maixabelen; Langraiz bideari esker, Maixabel Lasak bere senarraren hiltzaileekin elkartu ahal izan zuen espetxean.

Lehiaz kanpo

EiTB galan, Pausokak ekoiztua eta Javier García de Vicuñak zuzendutako Irabazi arte telesailaren lehen atala aurkeztuko da, ama galdu eta Bartzelonatik Euskadiko bere jaioterrira bizitzera joango den futbolari nerabe batean funtsatuta.

Aitor Merinok (Donostia, 1972) bere ahizpa Amaiarekin zuzendu zuen Asier ETA biok, eta 2013an Euskal Zinemaren Irizar Saria irabazi zuten lan horrekin; oraingoan Fantasía aurkeztuko digu, Málagako zinema-jaialdian estreinatu ondoren. Fantasíaren proiektua Ikusmira Berriak ekimenaren lehen edizioan garatu zen, eta familia baten historiari jarraitzen dio oroitzapenen eta gurutzaldi baten bitartez.

Igor Legarretak (Leioa, Bizkaia, 1973) Ilargi guztiak. Todas las lunas aurkeztuko du, bere bigarren film luzea, Kanadako Fantasia Jaialditik igaro eta Bilboko FANT inauguratu ondoren. Itziar Ituño, haizea Carneros eta Josean Bengoetxea ditu protagonista, eta XIX. mendearen amaieratik XX. mendearen hasierara bitartean gertatzen den fabula bat da, heriotzari eta hilezkortasunari buruzkoa.

Paperezko hegoak Josu Martínez (Bilbo, 1986) zinemagile, irakasle eta gidoilariaren lan berria da, eta Samara Velte (Zarautz, 1991) kazetari eta idazlearen debuta errealizadore gisa. Martínez eta Veltek lekukotza eta artxibo argitaragabeekin dokumentatu dute Euskaldunon Egunkariaren aurkako eragiketa.

Mireia Gabilondok (Bergara, 1965) hainbat film aurkeztu izan dizkigu Donostia Zinemaldian, hala nola Amaren eskuak (Zinemira 2013), eta oraingoan Kepa Errastiren Erlauntza / The Hive antzezlana film-formatura moldatu du Errasti berarekin batera; haurtzaroko lagun talde baten istorioa kontatzen digu filmean ¿Itziar Atienza, Naiara Arnedo, Sara Cozar, Getari Etxegarai, Aitziber Garmendia eta Leire Ruiz aktoreek egin dituzte rolak¿, landa-etxe batean elkartzen direnekoa, ezkondu aurreko agurra egiteko.

Zinemaldiaren programazioan parte hartuko duen baina Euskal Zinemaren Irizar Saria irabazteko lehian egongo ez den beste euskal ekoizpen bat Heltzear da; lana Zabaltegi-Tabakaleran emango da, Veneziako zinema-jaialdiko Orizzonti saileko film laburren lehiaketan parte hartu ondoren. Mikel Gurrearen (Donostia, 1985) film laburra 2021eko Kimuak katalogoan ere hautatu dute. Proiektuak garatzeko Ikusmira Berriak egonaldi-programan egon zen zinemagile donostiarra, eta indarkeria politikoko testuinguru batean nork bere mugak gainditzeari buruzko istorio bat kontatuko digu oraingoan.

Gainera, euskal filmetarako bi proiektu Zinemaldiaren 69. edizioko egitarauaren parte izango dira. Misión a Marte Mission to Mars, Amat Vallmajor del Pozo (Verges, 1996) kataluniarraren lehen lanak WIP Europan parte hartuko du, Zinemaldiak ekoizpen europarretarako duen work in progress sailean. Vallmajor del Pozok, Elías Querejeta Zine Eskolako ikasle ohiak (sorkuntzako espezialitatea), Euskal Herri postapokalitpiko batean girotu du bere lehen filma. Zinema Eskolako beste ikasle ohi bat (sorkuntzako espezialitatea), Marina Palacio (Donostia, 1996), bere lehen film luzea lantzen ari da, Y así seguirán las cosas / And thus it will go on, Ikusmira Berriak programako egonaldien testuinguruan, Ya no duermo film laburra zuzendu eta sariak jaso ondoren (Zabaltegi-Tabakalera eta Kimuak, 2020).

  • Marion Cotillardek eta Johnny Deppek Donostia Saria jasoko dute

Marion Cotillardek, egungo zinematografiaren barnean nazioarteko oihartzun handienetakoa duen aktore frantsesak, Donostia Saria jasoko du Zinemaldiaren 69. edizioan. Ohorezko golardoa irailaren 17an emango diote, ostiralean, Kursaaleko auditoriumean, lehiaketaren inaugurazio ekitaldian.

Cotillardek Oscar, Golden Globe eta BAFTA sariak eskuratu zituen La Môme / La Vie en Rose (Oliver Dahan, 2007) filmean egindako lanagatik, Édith Piafen rola egiteagatik, hain zuzen; izan ere, aktorea bereiziki nabarmendu izan da nola Europako hala Estatu Batuetako ekoizpenetan, talentu berdin-berdina erakutsi izan baitu rol guztietan, dramatikoetan ez ezik, komikoetan eta ekintzazkoetan ere bai; zinemagile ugarirekin egin izan du lan, hala nola hauekin: Michael Mann, Christopher Nolan, Woody Allen, Steven Soderbergh, James Gray, Dardenne anaiak, Arnaud Desplechin, Nicole Garcia, Leos Carax eta bere bikotekide Guillaume Canet zuzendari eta aktorea.

Johnny Deppek, zinematografia garaikidean ditugun talentu eta moldakortasun handieneko aktoreetako batek, Donostia Saria jasoko du irailaren 22an (asteazkena) Kursaal Auditoriumean, Donostia Zinemaldiaren 69. edizioaren barruan.

Depp hiru aldiz izendatu dute Oscar sarietarako; Golden Globe bat lortu du eta hamar aldiz izan da hautagai; Screen Actors Guild Award sari bat jaso du (gizonezko aktore onenarena), eta sari horietarako sei izendapen ere izan ditu; eta, azkenik, People's Choice Award sarien 14. edizioa irabazi zuen. Ikus-entzunezko 90 ekoizpenetan baino gehiagotan hartu du parte antzezle gisa, eta hamar filmen ekoizlea ere izan da, besteak beste, hauena: berriena, Minamata (2020), Andrew Levitasek zuzendua; Hugo (2011), Martin Scorsesek zuzendua; eta Crock of Gold: A Few Rounds With Shane MacGowan, Julien Templek zuzendua, Donostia Zinemaldiaren azken edizioan Epaimahaiaren Sari Berezia lortu zuena. Halaber, film laburrak zuzendu ditu, baita The Brave (1997) film luzea ere, non Marlon Brandok parte hartu baitzuen antzezle gisa.

Antzezle, zinemagile, ekoizle eta gidoilarien zerrenda luze batek baieztatu du Donostian izango direla Zinemaldiaren 69. edizioan euren filmak aurkezteko. Marion Cotillard eta Johnny Depp Donostia Sariez gain, aktore ugari ere bertaratuko dira Zinemaldira, hala nola hauek: Javier Bardem (El buen patrón, Sail Ofiziala), Jessica Chastain (The Eyes of Tammy Faye, Sail Ofiziala), Penélope Cruz (Competencia Oficial, Perlak), Emmanuelle Devos (Vous ne désirez que moi, Sail Ofiziala), Dolores Fonzi eta María Valverde (Distancia de rescate, Sail Ofiziala), Charlotte Gainsbourg (Jane by Charlotte, Perlak), Louis Garrel (La Croisade, Perlak), Vincent Lindon (Undercover –Sail Ofiziala– eta Titane –Perlak–), Noémie Merlant (Mi iubita, mon amour, Zabaltegi-Tabakalera), Clarke Peters eta Stanley Tucci (La Fortuna, Sail Ofiziala).

Halaber, zinemagintza garaikideko zuzendari garrantzitsuenetako batzuk Donostiara etorriko dira euren filmak aurkeztera, hala nola Laurent Cantet (Arthur Rambo), Lucile Hadzihalilovic (Earwig) eta Claire Simon (Vous ne désirez que moi) Sail Ofizialeko zinemagileak. Perlak sailean hautatutako filmei dagokienez, pertsona hauek izango ditugu Donostian: Julia Ducournau (Titane) Urrezko Palmorriaren irabazlea, eta Vincent Lindonez gain, Agathe Rousselle filmeko aktore protagonistak ere lagun egingo dio zuzendariari; Todd Haynes, Carol filmaren zuzendaria, zeinak The Velvet Underground aurkeztuko baitigu, Sean Baker, The Florida Project lanaren zuzendaria, zeina Simon Rex aktorearekin izango baita; Charlotte Gainsbourgek bere amari (Jane par Charlotte / Jane by Charlotte) egindako omenaldi zinematografikoa aurkeztuko digu; Virginie Efira aktorea Benedetta filmaren ordezkari gisa etorriko da; Louis Garrel eta Joseph Engel La Croisade / The Crusade filmagatik; Xavier Giannoli zuzendaria eta Benjamin Voisin aktorea Les illusions perdues / Lost Illusions filmari laguntzeko; Les Intranquilles / The Restless filmeko errealizadorea, Joachim Lafosse (Zilarrezko Maskorra 2015ean), Damien Bonnard eta Leïla Bekhti bikote protagonistarekin etorriko da, eta, azkenik, Céline Sciammak, Petite Maman aurkezteaz gain, master class bat eskainiko digu Nesten. Pandemiak eragindako mugikortasun-arazoak gorabehera, Asiako ordezkaritza garrantzitsua egongo da, Ryusuke Hamaguchi zuzendari japoniarrak (Guzen to Sozo / Wheel of Fortune and Fantasy eta Drive My Car) ere bidaiatuko baitu Donostiara.

Donostia Zinemaldiak Zabaltegi-Tabakalera sailean hautatutako zinemagile ezagunen bisita jasoko du, hala nola, Gaspar Noé (Vortex), Françoise Lebrun aktorearekin batera; Radu Jude (Babardeala cu bucluc sau porno balamuc / Bad Luck Banging or Loony Porn); Jean-Gabriel Périot (Retour à Reims [Fragments] / Returning to Reims [Fragments]), eta Peter Kerekes (Cenzorka / 107 mothers). Halaber, lehen edo bigarren filmarekin nabarmendu egingo diren emakumezko zuzendari gazteak ere izango dira Donostian: Tea Lindeburg (Du som er i himlen / As in Heaven, Sail Ofiziala); Alina Grigore (Crai nou / Blue Moon, Sail Ofiziala); Laura Wandel (Un Monde / Playground, Zabaltegi-Tabakalera), Cannesko Un Certain Regards sailean FIPRESCI saria jaso zuena eta Nesten master class bat emango duena; Florence Miailhe (La Traversée / The Crossing, Zabaltegi-Tabakalera); eta Kira Kovalenko (Razzhimaya kulaki / Unclenching the Fists, Zabaltegi-Tabakalera).

Sail Ofizialeko epaimahaiaren burua Dea Kulumbegashvili (Georgia) zuzendaria izango da; iaz lau sari ofizial irabazi zituen Dasatskisi / Beginning bere lehen lanagatik, besteak beste, film onenaren Urrezko Maskorra, zuzendari onenaren Zilarrezko Maskorra eta gidoi onenaren Epaimahaiaren Saria. Kulumbegashvilirekin batera, Susi Sanchez (Espainia) aktorea, Maite Alberdi (Txile) eta Audrey Diwan (Libano-Frantzia) zuzendari eta gidoilariak eta Ted Hope ekoizle estatubatuarra izango dira Sail Ofizialeko epaiamahaian.

Pentsamendua eta Eztabaida Donostia Zinemaldiaren arlo tranbertsalak, nazioarteko jaialdiek eta egungo zinema-kulturak dituzten erronkei erantzun nahi dienak, urte osoan zehar luzatzen diren proposamenen bidez, master classez (iazko parentesiaren ondoren aurten aurrez aurreko formatura itzuliko direnak), mahai-inguruz eta aurkezpenez osaturiko programa bat antolatu du 69. edizio honetan, sorkuntza zinematografikoaren, genero-berdintasunaren edo jasangarritasunaren inguruan betiere.

James Mockoski zinema-artxibozain eta American Zoetrope konpainiako zaharberritze-arduradunak Francis Ford Coppola zinemagilearen filmekin egin duen lana azalduko digu, hala nola Apocalypse Now pelikulan eta Klasikoak sailean proiektatuko diren filmean: The Rain People eta The Outsiders. Mockoskik Tabakalerako Z aretoan emango du hitzaldia, asteartean, 18:30ean.

Gainera, Nest sailaren 20. urteurrenarekin lotutako bi topaketa egongo dira. Batetik, hilaren 20an (astelehena), 11:00etan, Tabakalerako zinema-aretoan, Céline Sciamma zinemagile frantziarrak hartuko du parte solasaldi batean zinema ikasleekin (Petite maman bere filma Perlan sailean emango da). Agertoki berean, asteazkenean, 15:30ean, Laura Wandel belgikarraren txanda izango da, 2007an Murs film laburrarekin zinema-ikasleen topaketan parte hartu ondoren Zinemaldira itzuliko baita. Wandelek bere lehen film luzea aurkeztuko du Zabaltegi-Tabakaleran, Un monde / Playground, Cannesko Un Certain Regarden estreinatu eta FIPRESCI saria lortu eta gero.

Gainera, hilaren 21ean (asteartean), zuzeneko podcast bat grabatuko da Tabakalerako zinema-aretoan, eta akreditaziodunez ez ezik, edozein ikus-entzulek sartu ahalko da bertara, duela urte batzuk topaketan parte hartu zuten eta orain euren zinema-ibilbidea garatzen ari diren Nesteko ikasle ohiekin: Kiro Russo (Nueva vida, Nest 2015), Inês de Lima (De madrugada / At Dawn, Nest 2017), Mina Fitzpatrick (Wandervogel, Nest 2017) eta Óscar Vincentelli (Guillermo + Violeta, Nest 2018).

Zinemaldiak eta (H)emen ikus-entzunezkoen sektoreko eta arte eszenikoetako emakume profesionalen elkarteak, barneko lan-jardunaldi bat antolatuko dute genero-berdintasunarekin zerikusia duten gaiei buruz hausnartzeko, eztabaidatzeko eta akordioak lortzen saiatzeko. Eztabaidak elkarrekin lotutako hainbat alderdi hartuko ditu barne, besteak beste, hauek: profesionalak zinema-industrian eta, bereziki, zinema-jaialdietan sartzea, nola zinema-sailetan, hala eztabaida-foroetan; jaialdien kode etikoak, bereziki emakumeen aurkako delituei dagokienez; eta sexu- eta genero-nortasun desberdinen aitorpen eta berdintasuna.

Horrez gain, Identitateak eta aniztasuna. Egiturak aldatzen dituzten istorioak telesail-jardunaldiak, Europa Creativa MEDIA Desk Euskadirekin elkarlanean antolatuak, askotariko identitateen isla jorratuko du; Valeria Vegas kazetari eta idazleak moderatuko du jardunaldia eta Bob Pop idazle eta gidoilariak parte hartuko du. Halaber, Rolando Salazar Zinema Gay, Lesbiko eta Transaren Limako Jaialdiaren (Peru) zuzendariak moderatutako mahai-inguru batean LGTBIQ+ zinemak Latinoamerikan dituen erronkak aztertuko dira.

Pentsamendua eta Eztabaida ekimeneko jardueren beste zati batean, pandemiaren edo kontzientzia ekologikoaren ondorioz industria zinematografikoan gertatzen ari diren eraldaketak detektatuko dira. Batetik, Europa Distributionek bultzatutako mahai-inguru batean pandemiak industria zinematografikoan izan dituen ondorioak aztertuko dira, baita horiek pelikulen banaketa eta hedapena aldatu duten modua ere. Bestetik, Creative Europe MEDIArekin batera antolatutako ohiko European Film Forum mahai-ingurua egingo da, non sektorea industria iraunkorrago eta digitalago baterantz nola eraldatu den aztertuko baita. Zehazki, panel batek industria zinematografikoaren konpromiso ekologikoari buruz hausnartuko du, Europako Green Deal delakoaren parte gisa, eta beste batek, berriz, Europako ikus-entzunezko industriaren jardueren eta negozio-ereduen garapenean Big Dataren eta teknologia digitalen erabilera izango du ardatz.

Tresnen berrikuntzari lotuta, Zinemaldia & Technology Tabakalerako Z aretoan izango da ostegunean, 12:30ean. Jarduera horrek teknologiaren eta ikus-entzunezkoen arteko loturari buruzko hausnarketa egiten du, eta ekoizpen birtualari eskainiko dio laugarren edizioa, AC Coppens moderatzaile izango duen mahai batean. Horrez gain, Industria sailaren mahai-inguruen barruan, ProFicció, PROA, Catalan Films eta EFAren eskutik, koprodukzio europarrak egiteko aukerak aztertuko dituzte.

Azkenik, ikus-entzunezkoen gaitasun pedagogikoari buruz hitz egingo da Ikus-entzunezkoa eta irakaskuntza. Irakaskuntza ikus-entzunezkoetan mahaia-inguruan. Egedak bultzatutako saio horretan Fernando Rodríguez Lafuente kultura-kritikari eta -kudeatzailea izango da moderatzailea.

Elkarrizketa horiei Paolo Sorrentino zuzendari eta gidoilari italiarraren master classa gehituko zaie. Sorrentinok È Stata La Mano di Dio / The Hand of God aurkeztuko du, Veneziako Mostrako lehiaketa ofizialean izan ostean. La grande bellezza / The Great Beauty filmaren egileak bere azken filmari eta zazpigarren artearekin duen loturari buruz hitz egingo du Tabakalerako zinema-aretoan hilaren 22an (asteazkena), 19:00etatik 20:30era.

  • Atzerabegirako bat, zinema korearraren urrezko aroari

Donostia Zinemaldiak eta Espainiako Zinematekak, Euskadiko Filmategiarekin eta Centro Cultural Coreanorekin lankidetzan, Loreak infernuan. Koreako zinemaren urrezko aroa atzerabegirakoa antolatuko dute. Pandemia dela-eta iaz bertan behera gelditu zen zikloak 50. eta 60. hamarkadetako hamar film erakutsiko ditu eta liburu monografiko bat ere landuko da, Zinemaldiak, Espainiako Zinematekak eta Centro Cultural Coreano-k argitaratuko dutena.

Azken urteotan, Hego Koreako zinema nazioarteko jaialdi guztietan dago, eta zinema garaikideko erreferente bihurtu da; alabaina, zinematografia hartako historiak ezezagun samarra izaten jarraitzen du mendebaldarrentzat; are gehiago, Hego Koreako zinemari dagokionez, 90eko hamarkadatik aurrera ekoitzitako tituluak baino ez ditugu ezagutzen normalean.

Zikloa Koreako urrezko aroan ardaztuta egongo da, zeinetan publiko handiak eskatzen zuen zinema popularra ekoizteko gai izan zen industria zinematografiko bat garatu baitzen Hego Korean, gerraren ondoren herrialde hartako egoera ekonomikoa estua bazen ere, eta Park Chung-hee-ren diktadura militarrak ezarritako kontrola gorabehera. Hala, zuzendari ugariren karrerak finkatu ziren, horien estilo eta ikusminak askotarikoak zirela: batzuek garatzeko bidean zen gizarte moderno bat irudikatzen zuten, eta beste batzuek, ordea, garai hartako bizimodua gogorra zela salatzen zuten.

Hautaketa 50. eta 60. hamarkadetan ekoitzitako hamar filmez osatuta dago, eta bi helburu ditu: batetik, hegokorear zinema klasiko horren ordezkari garrantzitsuentzat jo daitezkeen zinemagileen taldea aldarrikatzea; eta, bestetik, garai hartako genero ohikoenen panorama bat marraztea, horietako batzuk amerikar zineman inspiratuta eta tokiko errealitatera eraman zirenak, eta beste batzuk, ordea, erabat autoktonoak zirenak.

  • Sigourney Weaver, kartel ofizialaren protagonista

Irudiak aktore estatubatuarraren zuri-beltzeko argazki bat agertzen du, brotxakada koloristekin apainduta. Beste sail batzuetako kartelak ekartzen dizkigu gogora; horiek ere Eva Villar Estudiok diseinatu ditu Juan Ugalderekin elkarlanean.


Laburrean

Non

Euskadi, auzolana