TikTok sare sozialean euskarazko umore errimatua sustatu asmoz antolatu dute ZirTok lehiaketa Mondragon Unibertsitateko Humanitate eta Hezkuntza Zientzien Fakultatea, Hiru Damatxo eta Bertsozale Elkarteak, Gipuzkoako Foru Aldundiaren Etorkizuna eraikiz ekimenak lagunduta.
Apirilaren 1etik aurrera euren bideoak igo ditzakete lehiaketan parte hartu nahi dutenek. Izan banaka, binaka edo taldeka, umore errimatuko bideo laburrak sortu beharko dituzte.
Hiru modalitate egongo dira: bata, lehiaketarako propio sortu diren TikTokeko filtroak erabiliaz, bat-batean zirtoa edo erantzun errimatua sortzea da. Bigarren modalitatean, berariazko filtroak erabiliko dira, bat-batean puntuari erantzuteko. Eta hirugarren modalitatea, esketx errimatuak sortzea da (zirtoka, puntuka, kopletan, rapeatzen… edo nahieran).
Eredu desberdin horien bideoak ikusgai daude TikTokeko ZirTok kontuan, eta baita www.zirtok.eus helbidean ere, leihaketaren oinarriekin batera. ERRE laukoteko Oihana Arana, Leire Vargas, Haizea Arana eta Aner Peritzek osatu dituzte adibideak. Bideoak telefono mugikorrez grabatu daitezke eta formatu bertikala izan behar dute. Denbora aldetik laburra behar du izan eta ezin dute egile eskubideak dituen irudirik edo musikarik izan. Lehiaketatik kanpo geratuko dira pertsonen pribatutasun eta irudi eskubideak urratzen dituzten bideoak, baita umore baztertzailekoak ere.
ZirTok-en 13 urtetik gorako edozeinek har dezake parte, eta parte hartzaile bakoitzak nahi adina bideo igo ditzake TikTok sare sozialera, betiere Zirtok kontua etiketatuta.
Sari nagusia, epaileek emango dutena 500 eurokoa izango da. Esketx errimatuen modalitatean, bat-bateko zirtoen modalitatean eta bat-bateko puntu erantzunen modalitatean 250 euronako sariak izango dira. Eta sari horietaz gain, zozketaz ere beste 250 euroko saria banatuko da.
Maiatzaren 31ra bitarte dago bideoak sortzeko aukera eta lan sarituak ekainaren 16an jakinaraziko dira.
Beraz badakizu, grabatu zure zirtoa eta parte hartu ZirTok lehiaketan.
Oinarriak PDFn deskargatzeko, klikatu hemen.
ZER DA ZirTok?
Tiktoken euskarazko umore errimatua sustatu eta bere eragina ikertzeko helburuarekin, "ZirTok" lehiaketa antolatu dute Mondragon Unibertsitateko Humanitate eta Hezkuntza Zientzien Fakultatea, Hiru Damatxo eta Bertsozale Elkarteak, Gipuzkoako Foru Aldundariaren Etorkizuna eraikiz ekimenak lagunduta.
LANEN EZAUGARRIAK
Parte hartzaileek umore errimatuko TikTokak edo bideo laburrak sortu beharko dituzte. Hiru modalitate egongo dira: esketx errimatua (aurrez prestatua), bat-bateko zirtoa (filtroekin), eta bat-bateko puntu erantzuna (filtroekin).
1. Esketx errimatua
Umore errimatuko bideo laburrak izango dira. Umore errimatua, nahieran egin liteke:
-Elkarrizketa errimatu laburra edo “zirtoa” osatuz (batak esan eta besteak errimatuz erantzun).
-Puntuari erantzunez.
-Puntuka eginez.
-Kopla edo bertso batekin osatuz TikToka.
-Rapeatuz
-…
Eredu gisa, ikusi hemen zer-nolako bideoak aurkeztu daitezkeen modalitate honetara.
2. Bat-bateko zirtoa (filtroekin)
Antolatzaileek TikToken emandako filtroak* erabiliz, bat-batean sortutako bideoak izango dira. Zirtoari erantzuteko modalitatean, ausaz esaldi bat agertuko da, eta bat-batean, esaldi batekin erantzun beharko da, errimatuz.
*Filtroa erabiltzeko, TikToka bidaltzear zaudela, sakatu “efektuak” botoian, gero lupan, eta bilatu ezazu “Zirtok”. Bi adin eskaintzen dira aukeran: 16 urtez azpikoei zuzendutako filtroak (-16) eta 16 urtez gorakoentzat direnak (+16).
Hemen ikusgai modalitate honetako ereduzko bideoa:
3. Bat-bateko puntua (filtroekin)
Antolatzaileek TikToken emandako filtroak* erabiliz, bat-batean sortutako bideoak izango dira. Puntuari erantzuteko modalitatean, ausaz puntu bat agertuko da eta, bat-batean abestuz, puntuari erantzun egin beharko diozu, neurri txikian nahi duzun moldean (kopla osatuz, 3 puntuko kopla, zortziko txikia, 9 puntukoa…).
*Filtroa erabiltzeko, TikToka bidaltzear zaudela, sakatu “efektuak” botoian, gero lupan, eta bilatu ezazu “Zirtok”. Bi adin eskaintzen dira aukeran: 16 urtez azpikoei zuzendutako filtroak (-16) eta 16 urtez gorakoentzat direnak (+16).
Hemen ikusgai modalitate honetako ereduzko bideoa:
PARTE HARTZAILEAK
13 urtetik gorako edonork har dezake parte lehiaketan.
Lanak banaka ala taldean osatu daitezke.
Kopuruari dagokionez, nahi beste bideo aurkeztu daitezke lehiaketara.
SARIAK
Hainbat sari banatuko dira lehiakideen artean:
• Bideo onenaren saria: 500€
• Esketx errimatu onenaren saria: 250€
• Bat-bateko zirto onenaren saria (filtroekin): 250€
• Bat-bateko puntu erantzun onenaren saria (filtroekin): 250€
• Zozketaz, parte hartzaile guztien artean: 250€
EPEAK
Lanak apirilaren 1etik maiatzaren 31ra bitarte (biak barne) bidali daitezke.
Lan sarituak ekainaren 16rako jakinaraziko dira.
LANAK AURKEZTEKO MODUA
Bideo laburrak TikTok-en argitaratu beharko dira, #Zirtok kontua etiketatuta.
TIKTOK-ak NON ZABALDUKO DIRA?
#zirtok etiketa duten bideoak TikTok plataformako ZirTok kontuan zabalduko dira eta lehian sartuko dira. Antolatzaileek lehiaketara aurkeztutako bideoei euren webgune eta sare sozialetan nahi besteko zabalkundea emateko eskumena izango dute, denbora mugarik gabe, ekimena sustatzeko edo-eta etorkizuneko didaktika helburuetarako.
ZERI EZ ZAIO ZABALKUNDERIK EMANGO?
• Edukia desegokia bada (iraingarria, sexista, arrazista, homofoboa, diskriminatzailea…), bideoaren zabalkunderik ez da egingo eta lehiaketatik kanpo geldituko da eduki hori.
• Saritua den bideoan adin txikikoak agertzen diren kasuan, gurasoek idatzizko baimena sinatu beharko dute saria jaso ahal izateko eta bideoari dagokion zabalkundea emateko.
EDUKIARI DAGOKIONEZ, ZAINTZEKOAK
• Bideoak telefono mugikorraz grabatu daitezke.
• Bideoak formatu bertikala izan behar du TikTokerako.
• Bideoak laburra izan behar du (nahi besteko laburra).
• Bideoek ezin dute egile eskubideak dituen irudirik edo musikarik erabili.
• Bideoek ezin dituzte urratu pertsonen pribatutasun eta irudi eskubideak (hildakoenak ere ez).
• Lehiakideek TikTok zerbitzuko terminoak bete behar dituzte. Horren arabera, zerbitzuak eskuratzeko edo erabiltzeko pertsonak 13 urte edo gehiago izan behar ditu, eta ezin du edozein pertsonarentzat difamatzailea den materialik eskura jarri, (lizuna, iraingarria, pornografikoa, gorrotagarria, arrazista, diskriminatzailea edo subertsiboa).
• Heldu gazteentzako TikTok-en pribatutasun-politikari buruzko informazioa, hemen.
• TikToken politika intelektualei buruzko informazioa, hemen.
