Urtero bezala, TAE Arabak askotariko ikastaroak eskainiko ditu, eta adin eta maila guztietara egokituko dira. Nabarmentzekoa da aurten antzerki prestakuntzan hasteko ikastaro berri bat inauguratuko dela: hiru egun eta, guztira, 4 ordu eta erdi astean. Ikastaroa antzerkian esperimentatu eta hasi nahi duten pertsona amateurrentzat da, eszenatokian erabiltzen diren oinarrizko tresnekin harreman perfektua izateko egina, hala nola ahotsa, interpretazioa, antzerki fisikoa, jolas dramatikoa eta abar.

Prestakuntza proposamen horrekin batera, ikastaro sorta zabala dago: helduentzako, eszenatokiaren mundura beste hurbilketa espezializatuago bat dago: 2 ikastaroz osatutako irakaskuntza progresiboa. Hori da eskolako ikastarorik osoena, eta irakasgai gehien eskaintzen dituena: ahotsa, kantua, gorputz adierazpena, interpretazioa eta jolas dramatikoa

Helduak ere, ikasle gazteagoekin batera –16 urtetik gorakoak–, 'Musika Antzerkia' ikastaroan elkarrekin aritzen dira, eta zenbait gazte taldek, berriz, 15 eta 18 urte bitarteko ikasleak biltzen dituztenak, haiei bereziki zuzenduta dagoen eskaintza daukate, "Gazteentzako antzerkia" izeneko atala, hain zuzen. Bertan, neska eta mutil taldeek batera lan egiten dute, interpretazioaren aukerak eta magia aurkitzen dituzte eta adiskidetasun sortzailea lantzen dute.

Txikienen kasuan, prestakuntza hiru adin tartetan banatzen da –3 eta 5, 6 eta 10, eta 11 eta 14 urte bitarteko taldeak–, eta hizkuntza eskaintza zabala da: gaztelania, euskara eta ingelesa.

Gainera, Arte Eszenikoen Tailerrak hirugarren urtez jarraian Agurainera zabaldu du bere prestakuntza eskaintza. Iaz bezala, 6-10 eta 11-14 urte bitarteko haurrentzako antzerki eskolak eta helduentzako “Antzerkiaren hastapenak” ikastaroa eskainiko dira Arabako herri horretako Harresi aretoan.

Ikastaro horien guztien matrikulazioa eskuragarri dago web orria (tae.araba.eus) irailaren 9ra arte. Urteko ikastaroek prezio publikoak dituzte, eta hiruhileko kuotatan ordain daitezke. Ikasleek hainbat hobari jaso ditzakete (% 20tik % 50era bitartekoak) familia ugarientzat, langabeentzat, genero indarkeriaren biktimentzat eta haien ondorengoentzat, besteak beste.

Arabako Arte Eszenikoen Tailerrak 40 urte baino gehiago daramatza aktoreak prestatzen eta antzerki praktikaz gozarazten, eta ikasturte hau 300 ikasle baino gehiagorekin itxiko du.

Matrikulazioa izapidetzeko edo zalantzak argitzeko, tae.araba.eus web orrira jo daiteke, 945 28 45 42 telefono zenbakira deitu edo tae@araba.eus helbide elektronikora idatzi. Matrikulazio izapideak linean egin behar dira, hemen: Matrikulazioa - tae - web.araba.eus

Datak:

Hauexek dira egun garrantzitsuenak:

• Matrikulazioa eskatzeko epea: 2024/09/09ra arte

• Onartutakoen zerrenda argitaratzea: 2024/09/10

• Plazak formalizatzea: 2024/09/11tik 2024/10/14ra arte

• Ikasturte hasiera: 2024/10/01

Ikastaro monografikoak:

Bestalde, urtean zehar bi motatako ikastaro monografikoak eskaintzen dira.

• Haur eta gazteentzako monografikoak. Ondo pasatzekoak dira, eta normalean oporraldietan egiten dira.

• Helduentzako monografikoak, gaian adituak diren gonbidatuek emanda. Ikastaro oso trinkoak eta espezializatuak dira, bi ikuspegi desberdinetara bideratuak. Alde batetik, hainbat arlotan sakontzeko bidean (ahotsa, gorputza…); eta, bestetik, profesional ezagunen lan egiteko modu espezifikoak aurkitzeko bidean (Andrés Limaren 'La cualidad', Juan Ayalaren 'Estrategias Laterales', Blanca Ortigaren 'La escena y los feminismos', Esther Ferrer…).