Escape Room hau 2022an sortu zen Escapelekurekin lankidetzan, Gasteizko Ihes-aretoetan aditua den erakundearekin. Jarduera horretan, parte-hartzaileek probak gainditu eta igarkizunak ebazten dituzte, Afrikatik Europara migratu behar izan duten lau pertsonaren historia ezagutu ahala. Ildo horretan, jokoa osatzen duten istorioek honako alderdi hauek jorratzen dituzte: migratzaileen errealitatea, Europako kontinentean aukerak bilatzeko; beren etxeak utzi behar izatearen arrazoiak; Afrikako migrazio-ibilbideetan Mediterraneo itsasoko kostaldera iritsi arte bizi duten errealitate gogorra; eta Europako herrialdeetara iristerakoan eta gure inguruko harrera- eta integrazio-prozesuetan dituzten zailtasunak.
Gainera, genero-desberdintasuna, zeharkakoa eta nabarmena kultura guztietan eta migratzen duten emakumeentzat ondorio latzak dituena, esplizituki ere lantzen da, jolasean aurkeztutako istorioetan elementu eta baldintzatzaile bereizgarriak sartuz.Parte hartzen duten gazteak 4 taldetan banatzen dira, eta talde bakoitzak planteatzen diren probak ebatzi behar ditu, betiere gainerako taldeekin koordinatuta; izan ere, jokoa ez da taldeen arteko lehiaketa gisa planteatzen, baizik eta parte-hartzaileen arteko lankidetza eta koordinazioa sustatzen da.
Jokoa ixteko, 4 taldeak amaierako puntu komun batera iritsiko dira, eta azken saria jasoko duen kutxa bat ireki beharko dute.
