Ondare Aretoak, Bilboko Euskal Museoak ekoiztutako Kameratik orratzera erakusketa ibiltaria aurkezten du.

Erakusketak Bilboko Euskal Museoak gordetzen duen Eulalia Abaitua (1853-1943) argazkilari bilbotarraren funtseko irudien aukeraketa bat du abiapuntu.

Oraingoan, Bilbo Handiko eta hurbileko bailaretako emakume langileen janzkerarekiko interesetik egin da hurbilketa. xix. eta xx. mendeen arteko txanbra, gona, jaka eta zapien xehetasunei erreparatuz, erabilera eta giro ezberdinetara egokitzen diren ezaugarriak biltzen dituzten lau eredu osatu dira.

Argazkiak ez ezik, garaiko lehengai, egikera eta ohiturak ere berreskuratu dira, orduko berrerabilera eta konponketek egungo birziklapen eta jasangarritasunaren oinarri berak dauzkatela erakutsiz.