Irungo Udaleko Kultura zerbitzuak jakinarazten du datorren larunbatean, maiatzak 10, 19:00etan, Amaia KZn, "Artze, Joxan… gogoan!" ikuskizuna eskainiko dela Joxean Artze Usurbilgo txalapartari eta poetaren omenez.

Sarrera orokorrak 16 euro balio du, eta Udalaren webgunean edo Luis Marianoren Turismo Bulegoan eros daitezke, edo Amaia KZko bertako leihatilan, ikuskizuna hasi baino ordubete lehenago, betiere sarrerarik geratzen bada.

"Artze, Joxan… gogoan!"

Multimedia ikuskizun bat da, euskal kultura garaikidearen erreferente handia den Joxean Artze txalapartari eta poeta usurbildarra gogora ekartzen duena. Eszenatokian musika, irudia eta poesia izango dira, eta Náyade Abesbatza izango da protagonista. Belén Sierra izango da pianoan, eta Mixel Ducau eta Caroline Phillips musikariek, Andoni Salamero poetak eta Itziar Gómez, Ainara Maya eta Pello Otxoteko poeta irundarrek kolaboratuko dute, eta Gorka Larrañagak sortuko ditu irudiak.