Mungiako San Pedro Jaiak 2025eko ekainaren 27tik uztailaren 6ra ospatuko dira. Gatibu, Süne, Mojinos Escozíos, PI LT eta Sukena izango dira kartelburuen artean, une handiak eskaintzeko promesarekin, publiko eta belaunaldi guztientzako proposamenekin.
Poz eta giro oneko egunez gain, musikak protagonismo berezia izango du gauetan, guztien gustura egokitutako kontzertu-programazio batekin. Hasiera ostiralean, ekainaren 27an, izango da, SÜNE taldearen eskutik, 23:00etan txosna-gunean. Huntzako abeslari ohia den artistak trikitixa eta elektronika uztartzen ditu, euskal instrumentu hau ardatz hartuta, tradizioari keinua eginez eta trikitixaren soinua berritzearen alde eginez.
Ekainaren 28an, larunbatean, une berezietako bat iritsiko da: Gatibu taldeak kontzertua eskainiko du Foruen plazan, 22:30ean, bere agur-biraren baitan. Rock euskalduneko talde esanguratsuenetako bat da Gatibu, 25 urteko ibilbidea bete duena, eta Mungian abenduan emango duen azken agurra baino lehen eskainiko du kontzertua. Bere zuzenekoa festa hauetako une hunkigarrienetako bat izango da, ‘EH Distopikala’ izeneko azken diskoan oinarrituta, rocketik haratago doazen soinu berriekin. Gau horretan bertan, txosna-gunean, 00:00etatik aurrera, Bidean Erromeria taldeak ere joko du; euren energiaz betetako zuzenekoak larunbateko musika-jardunaldia osatuko du.
Ekainaren 29an, igandean, Foruen plazan ere, Puro Relajo izango da protagonista (23:30ean). Herriko jendeak asko maite duen taldea da, rancherak, cumbiak eta korridoak giro alaiaz eta gertukoaz nahasten dituena. Kontzertuaren ostean, jaiak Kris DJ-ren saioarekin jarraituko du goizaldera arte.
Musikalki gauetako atsedenaldiaren ondoren, uztailaren 4an, ostirala, musika berriz ere protagonista izango da. 19:00etan hasita, Buen Castigo taldeak Fito y Fitipaldis taldeari eskainitako omenaldia eskainiko du, Javier Alzola taldeko saxo-jotzaile originalaren partaidetzarekin, taldearen ibilbidea errepasatuz.
22:30ean, berriz, Akerbeltz Erromeria Taldea arituko da Foruen plazan, beti bezala, dantzaz eta sorpresaz betetako zuzenekoarekin. Eta 00:00etatik aurrera, txosna-gunean, Sukena talde gaztea arituko da. 2023 amaieran bere lehen lana argitaratu zuten, eta horren ondoren sare sozialetan gorakada nabarmena izan zuten, euskal musikaren panoraman lekua eginez.
Eta amaiera borobila izateko, uztailaren 5ean, larunbatean, gaua bi agertokitan banatuko da. Foruen plazan, 22:30ean, PI LT talde mitikoa arituko da. Euskal punk-rockaren talde eraginkorrenetakoa da, beren zuzeneko indartsu eta mezu borrokalariek belaunaldi askotan eragin handia izan dute. Gainera, Mungiako jatorriko hainbat kide izango dira bertan, eta hori oso berezia izango da herritarrentzat.
Horrez gain, gauerdian, txosna-gunean, Mojinos Escozíos talde ezagun eta alaiak emango dio amaiera gauari, bere rock lotsagabe eta umorez beteriko ikuskizunarekin. Barre, jauzi eta kanta egiteko unea izango da, zalantzarik gabe.
Uztailaren 6an, igandean, Lorratz taldeak emango dio amaiera programa musikalari, 22:00etan, Mari Jataren agur eta zapien erreketa tradizionalaren aurretik.
Bertoko taldeak
Urtero bezala, aurten ere Mungiako talde lokalek aukera izango dute telonero gisa txosna-guneko kontzertuetan jotzeko, ekainaren 27an eta uztailaren 4an. Izena emateko epea maiatzaren 20ra arte egongo da zabalik. Parte hartu nahi duten taldeek baldintzak bete beharko dituzte—partaide gehienak Mungian erroldatuta egotea eta 30 eta 40 minutuko errepertorioa izatea—eta eskaera bidali beharko dute helbide honetara: jaiak@mungia.eus.
