Euskararen Nazioarteko Egunaren egitarau berezia Beasainen

Aittu! Euskara Elkarteak eta Beasaingo Udalak egitarau zabala prestatu dute aurten, abenduaren 2tik 11ra bitarte, euskararen erabilera, transmisioa eta parte-hartze komunitarioa ardatz hartuta.

Euskararen eguna egitaraua 2025

ABENDUAK 2 – Beasaingo Lehenengo Koaderno Demolinguistikoaren aurkezpena

• 18:00etan, Udaletxeko Batzar aretoan, Patxi Saez Belokik Beasaingo datuetan oinarritutako ikuspegi demolinguistiko berritzailea azalduko du, herriaren hizkuntza-egoeraren diagnostiko zehatza eta etorkizuneko aukerak mahaigaineratuz.

ABENDUAK 3 – Euskararen Nazioarteko Eguna

Gartxiren etorrera — Aurtengo berrikuntzarekin

• 11:00etan, Zubimuzu plazan, Beasaingo ikastetxeetako haurrek Gartxiri harrera egingo diote oihu eta festaz beteriko giroan.
  Aurtengo berrikuntza: haurrek beren Euskararen Kriseiluak eramango dituzte, eta Gartxik ekarritako Amaren Suarekin piztuko dituzte. Kriseiluak etxera eramango dituzte, familian euskararen inguruko hausnarketa sustatzeko.

Ixabel Olano Segurolari omenaldia

• 18:30ean, Ixabel Olano Segurola plazan, Beasaingo ikastolako lehen andereñoa eta euskal kulturaren sustatzaile handia izan zen Ixabel Olano omenduko da, bere ibilbidearen oroigarri gisa Beasainpediara bideratzen duen QR zeinuaren kokapena eginez. Ixabel Olanori Beasainen euskara hauspotzen eta sustatzen egindako lana eskertzeko Aittu! Euskara Elkarteak plaka bat emango dio familiari. Parte-hartzaileak: Musika Eskola, Narama eta Loinatz abesbatzak, Aurtzaka eta Ostadar dantza taldeak, Goizeresi Txistulari Taldea eta Ekaitz erraldoi eta buruhaundi konpartsa.

Euskararen kalejira

• 19:00etan, Ixabel Olano plazatik Loinazko San Martin plazara, erraldoiak, musikariak eta herritarrek euskararen aldeko jai-giroa zabalduko dute Beasaingo kaleetan barrena.

ABENDUAK 11 – Kriseiluen Festa

• 17:30ean, Usurbe antzokian, etxeetan zaindutako Kriseiluak berriz elkartuko dira festa berezi batean. Gartxik haurrei eskerrak emango dizkie egindako suzain lanagatik, eta Amaren Sua Damazulora eramateko unea iritsiko da.

Beasaingo Udalak herritar guztiei luzatzen die parte hartzeko gonbidapena, euskararen aldeko konpromisoa indartzeko eta euskaraz bizitzeko aukera gehiago sortzeko asmoz.