Azkuna Zentroa - Alhóndiga Bilbaok, Bilboko Udalaren Gizarte eta Kultura Garaikidearen Zentroak, Anónima aurkeztu du, Txuspo Poyo artistaren lanari buruz egin den erakusketarik zabalena, sakonena eta esanguratsuena. Izenburuak oinordetzan jasotako herri-jakintzari egiten dio erreferentzia eta 1990eko hamarkadatik gaurdaino egin dituen proiektu artistiko gehienak biltzen ditu.    

Álvaro de los Ángeles idazle eta ikertzaileak komisariatuta, artistaren proposamenen hautaketa bat bildu du, unibertso propio eta pertsonal bat sortu baitu, gai historiko eta dokumentalekin duen interesa eta proiektu artistiko gisa nola gauzatu dituen uztartuz. Era berean, erakusketak argi jasotzen ditu bere lanen sormen-ibilbidea, eta metodologia eta baliabide materialak, formatuak eta lengoaia garaikideak erabiltzean berrikuntzarako duen gaitasuna. 

Erakusketak aukera ematen du Txuspo Poyok bere praktika artistikoa Cadáveres exquisitos eta antzeko proiektuetan nola formalizatzen duen ikusteko.Egunkarietako ehunka bilberritan parte hartu du, imajinario pertsonal eta kolektiboaren parte den ondare baten berezitasuna nabarmentzeko. Era berean, horra hor, Izaro, Expediente: Túnel de la Egaña eta Gabinetes pedagógicos, identitate, historia eta ikerketen ondarearen erretratuak. Horietan guztietan, material dokumentala da haria, eta diziplina askoko lan bat ehuntzeko erabiltzen du, bideoaren, eskulturaren eta argazkiaren bidez zabalduz.  

Anónima gonbidapen bat da bere obraren sakontasuna eta konplexutasuna berriz deskubritzeko, eta ulertzeko nola aurreratu dituen orain arte garaikidearen eta kultura globalaren muinean dauden funtsezko eztabaida asko.

Txuspo Poyok bere ibilbidean barrena osatu duen corpus artistikoak lengoaia eta baliabide askotarikoak uztartzen ditu, besteak beste, zinema, bideoa, argazkia eta instalazioa. Horien bidez, kulturaren, teknologiaren eta politikaren arteko elkarguneak aztertzen ditu. “Bere lanean, askotan, zalantzan jartzen ditu errealitatearen eta fikzioaren, zientziaren eta mitologiaren, iraganaren eta orainaren arteko mugak, eta sortzen duen narratiba bisualak gogoeta piztu nahi du aginpideak, eratorritako kontrol-mekanismoek eta historia garaikideak sortzen dituzten loturei buruz”, dio Álvaro de los Angelesek. 

JARDUEREN EGITARAUA

Erakusketa dela eta, Azkuna Zentroa - Alhóndiga Bilbaok jarduera-programa bat diseinatu du. Gaur arratsaldean hasiko da, inaugurazioaren aurretik, Txuspo Poyoren eta Álvaro de los Angeles komisarioaren arteko solasaldiarekin. Bertan, bere ibilbidea eta metodologia aztertuko ditu.

Martxoaren 5etik aurrera, ostegunero, 18:30etan, sarrera bisitak egingo dira Erakusketa Aretoan, eta eskola publikoarentzako tailer batzuk, 11:00etatik 13:00etara, martxoaren 6, 13, 20 eta 27an eta apirilaren 17 eta 24an.

Nabarmentzekoa da, halaber, Hondakina, oszilazioa, lekualdaketa Elkarrizketa, Txuspo Poyoren Anonimoa(z), elkarrizketa Fernando Bayón eta Jaime Cuencarekin, martxoaren 11n, asteazkena, Zentroko Bastida aretoan. Erakusketako piezen hautaketa batean oinarrituta, jendaurrean filosofia egitea da asmoa topaketa honetan, Erakusketa Aretoan ikusgai dagoen obrarekin eta obratik pentsatuta, baina hari buruz inolako irakasle-azalpenik eman gabe.

Sarrera librearekin, aldez aurretik izena emanda webgunean lekuak bete arte,  elkarrizketa ireki honetan, oroimenaren eta ahanzturaren mugak, naturala eta artifizioa, presentzia eta absentziaren inguruan hitz egingo dute. Gainera, bertaratutako ikusleek borondatez parte hartzeko gune bat dago.

KATALOGOA

Erakusketak katalogo bat du gaztelaniaz eta euskaraz, erakusketaren irudiak eta Txuspo Poyoren ibilbide artistikoa definitzen duten prozesu eta gako kontzeptualetan sakontzen duten edukiak biltzen dituena. Argitalpena datozen asteetan jarriko da salgai.

TXUSPO POYO

Txuspo Poyo (Altsasu, 1963). Diziplina askoko artista da, Arte Ederretan lizentziaduna Euskal Herriko Unibertsitatean, eta New Yorkeko International Studio and Curatorial Program-en eta New Yorkeko Unibertsitateko Center for Advanced Digital Applications-en trebatua. 

Laurogeita hamarreko hamarkadaz geroztik garatzen duen praktika artistikoa kultura eta belaunaldiko gertakarien muntaketan eta ikerketan oinarrituta dago. Bere lanak batera biltzen ditu zinema, animazioa, arkitektura eta zientzia-fikzioa, eta osatzen dituen kontakizun bisualetan historia, memoria eta imajinario kolektiboa gurutzatzen dira.   

Arlo asko arakatu du, film-euskarrietan filmak berreraikitzetik hasi eta Pixel visión kamera eta teknologia ludikoak erabiltzeraino, mendebaldeko ikus-entzunezko kulturan portaera soziala, morala eta generokoa aztertzeko helburuarekin.  

ÁLVARO DE LOS ÁNGELES

Komisarioa, idazlea eta ikertzailea. Arte Ederretan lizentziaduna da Valentziako Unibertsitate Politeknikoan eta Southampton Institute of Higher Education-en, eta Arte Ederretako Masterra lortu zuen Norwich School of Art and Design-en (Erresuma Batua). 2014 eta 2018 artean, Institut Valencià d’Art Modern-eko Kultura Jardueren eta Programen zuzendariordea izan zen.