Kartel, aldizkari-azal, artxiboko irudi, jazz musika eta marrazki bizidunen bidez osatutako collage honek 70eko hamarkadako Marokoko arte-eszenara garamatza. Garai hartako artista asko kartzelan amaitu zuten edo arrastorik gabe desagertu ziren. Istorioa 1974ko Mostafa Derkaouiren Zentzurik gabeko zenbait gertakariri buruz (Acerca de algunos acontecimientos carentes de sentido) film independentearen inguruan ardazten da; lan horretan, zinemagile gazte talde batek Marokoko zinema berriak gizartean bete beharko lukeen papera aztertzen du. Kontrakultura mugimendu ikasle marxistengandik sortu zen, zinema "emantzipaziorako" eta norbere burua ezagutzeko "tresna" gisa ikusten baitzuten. Hala ere, jendaurreko proiekzio bakar baten ondoren, gobernuak filma zentsuratu zuen. Aspaldi galdutako film horren negatiboak, ordea, Espainian aurkitu zituzten eta berriki zaharberritu dituzte. Zentsuraren eta zapalkuntzaren biktima guztiei zuzendua, Eguzkia sartu aurretik (Antes de que se ponga el sol) lanak era sediziosoan editatutako pasarteak erabiltzen ditu, etorkizunarekiko ilusio handiko garaia gogora ekarriz, Hassan II.a erregearen errepresio-urteek ilusio hori itzali aurrekoa. Gaur egun, gar hori laburki pizten da berriro, irudi hauek beste behin erakustearekin batera.
