Bilboko Udal Musika Bandak bihar ostiralean, irailaren 11n, emango dio hasiera 2026/2027 denboraldiari, “Ibilbideak”, Azkuna Zentroa – Alhóndiga Bilbaoko Kulturen Atarian eskainiko duen kontzertuarekin, 19:00etan. Iñaki Urkizu Kerejeta zuzendariordeak hartuko du batuta lehen hitzordu honetan.
Programak jatorri, estilo eta garai desberdinetako sei obra bilduko ditu. Emanaldia Julián Palancaren “Goya” lanarekin hasiko da; ondoren, James Barnesen “Appalachian Overture” eta José Francoren “Euskalherria” obertura interpretatuko dira. Musika-ibilbidearen bigarren zatian, Gerónimo Giménezen “La Torre del Oro” preludio sinfonikoa, Philip Sparken “Orient Express” eta Joe Hisaishiren “Howl’s Moving Castle” entzungo dira.
Bandaren buru Iñaki Urkizu Kerejeta izango da, 2007tik taldeko zuzendariordea. Donostiako Goi Mailako Musika Kontserbatorioan tronpeta-ikasketak egin zituen Urkizuk, eta ibilbide oparoa du interprete, irakasle, zuzendari, moldatzaile eta transkriptore gisa. Bere ibilbidean zehar Euskadiko hainbat musika-talde zuzendu ditu, eta Bilboko Udal Musika Bandarekin proiektu eta grabazio ugaritan parte hartu du.
Emanaldi honekin, Bilboko Udal Musika Bandak “Ibilbideak” 2026/2027 denboraldi berria inauguratuko du, hiribilduko ohiko agertokietako batean.
IÑAKI URKIZU KEREJETA (Bilboko Udal Musika Bandako zuzendariordea)
Bere herriko Udalaren Bandan hasi zen tronpeta jotzen, zortzi urterekin, familiaren tradizioari jarraituta. Handik Tolosako Udal Bandara pasatu zen eta han bakarlari jardun zen hamarkada batez. Donostiako Goi-mailako Kontserbatorioan egin zituen tronpeta-ikasketak Juan Manuel Gómez de Edeta irakaslearekin. Irakasle jardun da Beasain eta Tolosako musika-eskoletan, baita "Arrasate Musical"-en ere.
Instrumentista moduan Euskal Herriko talde askorekin elkarlanean aritu da. Horietako aipagarrienak hauexek: Bilboko Orkestra Sinfonikoa, "Arrasate Musical" Orkestra Sinfonikoa, Juan Crisóstomo de Arriaga Kontserbatorioko Banda Sinfonikoa, Donostiako Talde Barrokoa, Lattor metalezkoen boskotea, Araba Brass Taldea eta Gasteiz Big Band; azken honetan, gainera, zuzendaria izan zen. Bakarlari moduan egindako lana ere aipagarria da, Benantzi Bilbao eta Aitor Olea organistekin, eskainitako organoaren eta tronpetaren kontzertuetan.
Banden munduan oso ezaguna da moldaketak eta transkripzioak egiteagatik eta musika-banda askok jaso ohi dituzte bere lanak programetan. Laurogeiko hamarkadatik aurrerako euskal musikaren bilduma bat prestatu du eta horien lehen lau zenbakiak argitaratuta daude: "Jaialdia", "Dantzaldia", "Kantaldia" eta "Betikoskorri". Azken lan hori izenak, adierazten duenez, Oskorri folk-talde ezagunaren omenez egina. Halaber, moldaketa asko musika-ikuskizunarentzat egin du, besteak beste, Serafín Zubirirentzat "Recordando a Nino Bravo" eta "El Baúl de los 70".
Ertzaintzako Musika Bandako zuzendaria izan da 1998tik eta banda horretan tronpeta-jole bakarlari-plaza ere izan zuen. Bere batutapean CD bat grabatu da, Bergarako Orfeoiarekin batera, José Franco, Luis Aramburu, José Mª González Bastida eta Juan Arzamendiren lanekin. Bilboko udalaren musika Bandarekin ere zenbait CD grabatu ditu, bata Bilboko Koral Elkartearekin bere 125.urteurrenan "Kantuz Hari den Herria" izeneko musika-lana, bi abesbatza eta Bandarentzat berak idatzita, eta bestea Zarzuelari eskainita, Masa Coral del Ensanche, Miren Urbieta (sopranoa), Vicenç Esteve (tenorra) eta Fernando Latorrerekin (baritonoa).
Zuzendari gonbidatua izan da Euskadiko zenbait Bandetan, Barakaldoko udalaren Banda, Durangoko "Tavira" Musika Banda edo Gasteizko Udalaren Banda, besteak beste. SGAEko kidea eta 2017tik Bilboko Udalaren Musika bandaren zuzendariordea da.
