Bilboko Udalak "Bilbao Edita" laguntzaren 2026ko deialdia jarri du abian, liburuak argitaratzen dituzten argitaletxeei eta/edo profesionalei zuzendutako laguntza-poltsa, tokiko argitalpen-ekoizpena bultzatzeko.

Deialdi berri honetan liburuak argitaratzeko bost proiektu aukeratuko dira, bi kategoriatan banatuta: hiru, 3.000 euroko zuzkidurarekin bakoitza, eta bi, 6.000 euroko banakako zuzkidurarekin. Laguntzaren zenbatekoak mota guztietako gastuak edo kostuak barne hartuko ditu, BEZa izan ezik, aukeratutako profesionalari edo enpresari ordainduko baitzaio, dagokion zerga-tasaren arabera.

Bi kategorietako batean nahikoa proiektu aurkezten ez badira, edo proiektuak hautatzeko batzordeak aurkeztutakoak kalitate nahikotzat jotzen ez baditu, eskura dagoen dirua beste kategoriari metatu ahal izango zaio.

Proiektuak 2027an editatu beharko dira, eta 2026ko azaroaren 13ra arte aurkeztu ahal izango dira, ostirala barne. Eskatzaileak argitalpen-enpresak edo profesional autonomoak izan daitezke, egoitza soziala edo helbide fiskala Bilbon dutenak.

"Bilbao Edita" Bilboko 2023-2033 Kultura Plan Estrategikoaren postulatuen barruan sartzen den ekimena da. Plan horren helburua da kultura hiriaren markaren irudi gisa sendotzea, tokiko kultura-eragileak indartzea eta lankidetza publiko-pribatua sustatzea. Era berean, bat dator Planaren zeharkako ildoekin, eta euskararen erabilera sustatzeko hautaketa-irizpideak jasotzen ditu.

Laguntza-poltsa horrek Bilbao Aurrera Planen bideari jarraitzen dio, gizarte-kohesiora, ekonomia suspertzera eta tokiko kultura sustatzera bideratutako neurrien multzo bat.

BETEKIZUNAK ETA BAZTERKETAK

Proposamenen helburua aurretik sortutako eta argitaratu gabeko lanak argitaratzea izango da. Kanpoan geratzen dira testuliburuak, entziklopediak, hiztegiak, agendak, dietarioak eta antzekoak, gida didaktikoak, gidoiak edo aldizkako argitalpenak, urteko memoriak eta edozein erakunde publikok eta erakunde autonomok agindutako argitalpenak.

Lana paperean, formatu digitalean edo bietan editatu ahal izango da, eta gaztelaniaz, euskaraz edo bi hizkuntzetan aldi berean argitaratu ahal izango da. Era berean, lana edozein motatakoa izan daiteke, eta ez dago ezarrita genero espezifikorik.

"Bilbao Edita"-ren aurreko edizioaren bidez lau liburu argitaratu ziren: Fiebre y veneno (Ediciones Beta III Milenio SL); Historias deportivas de Bilbao (Incobi Diseño, Marketing y Publicidad SL); Del corazón cansado (Ediciones El Gallo SLU); Fiesta y rebeldía –Historia oral del rock radical vasco (Last Tour Liburua SL) eta Mari-Aguirre (Bukinda SLU).

Oinarri zehatzak https://www.teatroarriaga.eus/informacion/proyectos-y-audiciones/?lang=eu eta https://bilbaokultura.eus webguneetan argitaratuta daude. Proiektuak posta elektronikoz aurkeztuko dira honako helbide honetan: cultura@bilbao.eus eta euskaraz edo gaztelaniaz bidali ahal izango dira.