Bilboko Koral Elkarteak Mirentxu operaren grabazioa aurkeztu du, Jesús Guridiren lanik enblematikoenetakoarena. Diskoaren argitalpena Euskal Opera proiektuaren barruan dago, zeina Koral Elkarteak euskal ondare lirikoa berreskuratzeko, grabatzeko eta zabaltzeko sustatzen duen, Petronor, Eusko Jaurlaritza, Bizkaiko Foru Aldundia eta Inaem erakundeen laguntzarekin.
Mirentxu, 1910ean konposatua eta 1947an berrikusia, bi ekitaldiko pastoral lirikoa da, Guridik euskal kulturaren edertasuna landa-eremuko giro idealizatuaren eta musika-hizkuntza sakonki hunkigarriaren bidez islatzeko zuen maisutasuna erakusten duena. Aurkeztu berri den grabazioak, IBS Classical zigiluak egina, 1947ko bertsio berrikusia dakar, Jesús María de Arozamenak egokitutako gaztelaniazko libretoarekin eta Ramón Lazkano konpositoreak ICCMUrekin (Musika Zientzien Institutu Knplutentsea) elkarlanean egindako berrikuspen kritikoarekin.
Musika-interpretazioaz Unai Urrecho arduratu da, BOS - Bilbao Orkestra Sinfonikoa eta Bilboko Koral Elkarteko koru mistoa eta haurren korua zuzenduz, baita lehen mailako abeslari-taldea ere: Vanessa Goikoetxea sopranoa (Mirentxu), Carmen Artaza mezzosopranoa (Presen), Gillen Munguía tenorra (Raimundo), Damián del Castillo baritonoa (Txanton) eta Julen García baritonoa (Manu). Horiez gain, hainbat koralistak parte hartu dute, hala nola Adriana Fernández (Bixente) eta Maren Sastre (Teodoro) tipleek, eta Urko Sangroniz (Artzaina) baritonoak.
Euskal Opera proiektuak, orain arte Maitena eta Lide ta Ixidor obrak berreskuratu dituenak, Bilboko Koral Elkarteak euskal opera-ondarea berreskuratzeko duen konpromisoa berresten du. Mirentxu beste urrats bat da musika-eszena garaikidean leku nabarmena izatea merezi duen errepertorio ahaztuaren balioa nabarmentzeko. Aipatu beharra dago konpositorearen alaba Julia Guridiren jarraipena eta laguntza eduki izana oso garrantzitsua izan dela, bere aitaren ondarearekiko duen konpromisoa funtsezkoa izan baita grabazio honen arrakastarako.
Grabazioa, dagoeneko eskuragarri dagoena plataforma digital nagusietan streaming bidez erreproduzitzeko, eta CDa IBS Classical diskoetxearen webgunean salgai, zorroztasun tekniko eta artistiko handiarekin egin zen, eta ondoriozko sonoritate ezin hobeak bizia ematen dio balio historiko eta emozional handiko obrari. Hala, grabazioaren argitalpena beste mugarri bat da euskal musika-ondarea berreskuratzeko bidean, eta Euskadiko kultur erreferente gisa Euskal Opera proiektuaren balioa indartzen du.
