"Ondarea bizirik! Patrimonio vivo" programak urriaren 3tik 107 ekitaldi baino gehiago eskainiko ditu Gipuzkoako 33 herritan. Eskainiko diren jarduerek gure ondarea bizirik mantentzeko askotariko moduak aztertuko dituzte: artisau lanbideak, kontserbazio eta babes teknikak, ondarea zaintzen duten komunitateak eta, batez ere, transmisioa, eragiten duena gure hizkuntza, tradizio, jai, kirol eta ospakizunek oraindik ere espazio nabarmena izatea gure herri eta hirien egunerokotasunean.
Jarduera programa hau 50 eragile baino gehiagoren lanaren emaitza da, bat egin baitute Gipuzkoako Foru Aldundiak ekitaldi bana antolatzeko luzatutako deiarekin. Ekitaldien xede nagusia izango da Gipuzkoako ondare garrantzitsua ezagutaraztea, transmisioan jarrita arreta. Hainbat gai jorratuko dira: desagertzear dauden lanbideak; joko, ohitura edo dantzak berreskuratzea; artisautza; dokumentuak eta artelanak kontserbatzea…
Ekitaldien artean izango dira kontzertuak, erakusketak, bisita komentatuak, tailerrak, hitzaldiak edo scape roomak.Parte hartzaileek aukera izango dute gure lurraldeko ondare bizia ezagutzeko bisita komentatu dinamikoen bidez, gure iraganean desagertutako praktiken berri izateko eta Ondarearen Europako Jardunaldien harira ateak zabaltzen dituzten zenbait leku ezagutzeko.
Ekitaldien ibilbidea Gipuzkoa Kultura webgunean eskuratu daiteke (https://www.gipuzkoa.eus/eu/web/kultura/programak/ondarearen-europako-jardunaldiak/aktibitate-katalogoa), baita kultur etxeetan eta museoetan eskura jarriko den paperezko jarduera katalogo batean ere.
Era berean, web orri honetan kontsultatu ahal izango dira Euskadin egingo diren programa guztiak: https://www.europako-ondarea.eus/
Desagertutako abestien kontzertuak
Jardueren artean, antzinako ohiturak edo tradizioak berreskuratzen dituztenak nabarmentzen dira. Horixe da Euskal Itsas Museoak antolatutako «Itsas(sos) kantak, denen ondarea!» jardueraren kasua. Izan ere, Sara Azurza museoko komunikazio arduradunak adierazi duenez, kontzertu honetan «Rafa Rueda, Gartxot, Janus Lester eta Lide Hernando bezalako artista lokalek itsasoari buruzko abestiak berreskuratuko dituzte». Datorren larunbat arratsaldean izango da, urriaren 21ean, eta sarrerak museoaren webgunearen bidez erreserbatu ahal izango dira.
Jardunaldietako jardueren formatuak etengabe ebaluzionatzen dute, eta horren froga da Lenbur Fundazioak Legazpin urriaren 8rako antolatu duen ekitaldia; «Burdin magikoaren scape roomean ebatzi beharreko enigmak Euskal Herriko lanbide tradizionalei buruzkoak izango dira», Agurtzane Elustondo Lenbur Fundazioko zuzendariak adierazi duenez.
Edizio honetan, gainera, kontserbazioa programaren funtsezko elementua da. Jantziaren Zentroan, Errenterian, datorren azaroaren 12an eta 19an, ezagutu ahal izango da jantzi batek zer ibilbide egiten duen Kapitain-Etxean sartzen denetik Gordailuan amaitzen duen arte, Ramon Garcia zuzendariak jakinarazi duenez.
Irisgarritasuna zaintzen duen programa
Ondarearen Europako Jardunaldiek Gipuzkoan irisgarritasunaren aldeko apustua egiten dute beti. Paperezko programak braillez dagoen QR kode bat du azalean; hala, programa irakurri ahal izateko diseinatu den ibilbidearen PDF irisgarria eskuratu ahal izango dute ikusmen urriko pertsonek eta itsuek. Dokumentu hori Gipuzkoa Kulturaren webgunean ere egongo da eskuragarri, euskaraz nahiz gaztelaniaz.
Bestalde, aurten programako 107 ekitaldiei buruzko informazioan, hirugarren urtez jarraian, irisgarritasun neurriei buruzko argibideak jaso dira (ukipen elementuak, braille, zeinu hizkuntza, irakurketa erraza, azpidatziak, etab.).
Helburua da informazio ahalik eta argiena ematea, gizarteko talde jakin batzuei gure kultura ondareaz gozatzea galarazten dieten oztopoak ezabatzeko.
Ondarearen Europako Jardunaldiei buruz:
Ondareari buruzko Europako Jardunaldiak Foru Aldundiak sustatutako proiektua da. Gipuzkoako, Arabako eta Bizkaiko foru aldundiak elkarrekin eta Eusko Jaurlaritzarekin lankidetzan aritu dira jardunaldiek Euskadi osoan duten eragina indartzeko, ahaleginak optimizatzeko eta esperientziak trukatzeko.
Gipuzkoan, K6 Gestión Cultural enpresaren bulego teknikoak egin ditu programaren inguruko koordinazio lanak, eta Euskal Herriko Unibertsitateko Balioen Filosofia eta Gizarte Antropologia Saila arduratu da aholkularitzaz, Iñaki Arrieta irakaslearen bitartez.
Halaber, zazpigarren edizio honetan, Mondragon Unibertsitateko LEINN graduko ikasle talde baten parte hartzea izan du Foru Aldundiko Kultura Departamentuak, programa hori gazteei hurbiltzeko asmoz.
Argibideak
“Ondarea bizirik! Patrimonio vivo!”
107 ekitaldi
Datak: Urria, azaroa
Lekua: Gipuzkoako 33 udalerri.
Ekitaldi motak: kontzertuak, erakusketak, bisita komentatuak, tailerrak, hitzaldiak edo scape roomak.
Prezioa:gehienak doakoak dira. Kontsultatu jarduera bakoitza.
Norentzat: pertsona guztiak, familiak, haurrak, eta ikusmen desgaitasuna, desgaitasun kognitiboa, desgaitasun fisikoa nahiz entzumen desgaitasuna dutenak.
Gipuzkoako jarduerei buruzko informazio gehiago:
Gaztelaniaz: https://www.gipuzkoa.eus/es/web/kultura/programak/ondarearen-europako-jardunaldiak/aktibitate-katalogoa2023
Euskadiko jarduerei buruzko informazio gehiago: https://www.europako-ondarea.eus/
