Donostiako Jazzaldia 2024: egitaraua

Donostia-San Sebastián 2024(e)ko uztailaren 23(e)tik 2024(e)ko uztailaren 28(e)ra
  • Donostiako Jazzaldia 2024: egitaraua
    Egilea: Detritus

Jazzaldia 2024ko uztailaren 23tik 28ra izango da eta, egitarauan, punta-puntako izenak eta joera ugari izango dira.

Programazioan bokalisten eskaintza bikaina dugu: Rufus Wainwright eta Diana Krall kanadarrak, lehena Jazzaldian aurreneko aldiz izango duguna, eta bigarrena, berriz, lider absolutua Jazzeko emakumezko abeslarien rankingean; Marisa Monte brasildar zoragarri eta berdingabea, konpositore bikaina eta agertokian karismaz betea; Sílvia Pérez Cruz katalana, aparteko momentu sortzaile batean, bere azken proiektuarekin; Gregory Porter handia, primerakoa eta ikonikoa Jazzeko gizonezko abeslari guztien artean; eta Youn Sun Nah korearra, fina, dotorea, xarma berezi eta ahots ikusgarri baten jabe.

Jazz garaikidearen arloan bi sortzaile apartari eskainitako bi ziklo nabarmentzen dira. Lehenengoa, John Zorn saxofonista, hiru saiotako protagonista izango da: bi Kursaaleko Auditorioan eta hirugarrena Trinitate Plazan. Guztira sei talde arituko dira hiru saio horietan, Julian Lage, Brian Marsella, Ches Smith, Jorge Roeder, John Medeski eta beste hainbat instrumentista bikain biltzen dituzten proposamenekin. Saxofonista eta konpositore handiaren ziklo honi amaiera bikaina emateko, Zorn bera Trinitate Plazan arituko da New Masada Quartet taldearekin.

Beste sortzaile garaikide handi bati eskainitako bigarren zikloan William Parker baxua izango da protagonista. Europan nekez ikus daitekeen musikari honek hiru kontzertu eskainiko ditu, bere hirukote, bikote eta laukotearekin, hiru agertokitan. Bi abonamendu sortu dira bi ziklo horietako bakoitzeko kontzertu guztietara joan nahi dutenentzat.

Gaur iragarritako izenen zerrendan Jazzaren eszenako beste izar asko daude: egungo Jazzean den pianistarik sortzaileena, Brad Mehldau, benetako jenioen laukote bat osatuta, lidergoa partekatuz Chris Potter saxofoian, John Pattituci baxuan eta Johnathan Blake baterian; gure musikan mito bihurtutako bikote bat, John Scofield eta Dave Holland; eta izarren belaunaldi berriko hiru pianista gailen, Marco Mezquida balearra, Marta Sánchez madrildarra eta Júlio Resende portugaldarra.

San Telmo Museoan, ohi bezala, anplifikaziorik gabeko akustika zorrotzean, pianista handiez gozatu ahal izango dugu eta aurten, berritasun gisa, baita duo emanaldiez ere.

Laugarren aldiz jarraian ospatuko da, Victoria Eugenia Antzokian, JazzEñeren hamargarren edizioa, SGAE Fundazioak antolatua. Lau saio bikoitz izango dira, showcase formatuan, Jazz hispanoaren eskaintza onenarekin. Aukeratutako 8 proposamenen programazioa 2024ko udaberrian emango da ezagutzera.

Iragarritako kontzertuetarako sarrerak eta abonamenduak salgai daude jada. Erosketak presentzialki egin daitezke leihatilan, baita online ere.

Keler Guneko egitaraua

Keler Gunea, Zurriolako hondartza zoragarrian kokatua, berriro ere, Jazzaldiko gunerik heterogeneoena eta jendetsuena izango da. Uztailaren 24tik 27ra zortzi kontzertu eskainiko dira dohainik, horietako bost emakumeek lideratuak. Talde euskaldunak, estatubatuarrak eta afrikarrak arituko dira bertan, eta askotariko estiloak entzungo dira, besteak beste hegoaldeko rock estatubatuarra, popa, musika urbanoa, teknoa, sustrai musikak, bluesa eta indiea.

Blues Garaikideko Album Onenaren Grammy saria irabazi berri duten Lovell ahizpak, Larkin Poe beren taldearekin batera, Keler Gunean arituko dute uztailaren 24an, Zurriolako hondartzan. Blood Harmony beren albuma Estatu Batuetako hegoaldeak ezaugarri dituen musiken bilduma zoragarria da: bluesa, gospela, bluegrassa edo, besterik gabe, hegoaldeko rocka. Berealdiko zuzenekoetan gorputz eta arima aritzeagatik, eta gitarra eta ahotsen birtuosismoagatik bereizten da Larkin Poe.

Agertoki berean, aurretik, gure hirian maiteen dugun artistetako bat izango da, Izaro. Aukera paregabea Cerodenero gozatzeko, artista kontsolidatu honek, aldi berean eboluzio betean dagoen honek, kaleratutako azken albuma. Abeslari zoragarri honek mundu propio bat du, eta hasieratik erakutsi ditu aparteko sentsibilitatea eta ezohiko nortasuna.

Egun horretan bertan, uztailaren 24an, beste lau kontzertu izango dira Kursaaleko terrazetan, oso bestelakoak elkarren artean eta, horrexegatik, erakargarriak. Hauek dira: BIGYUKI teklista eta Tomoaki Baba saxofonista japoniarrak; Marcin Masecki pianista poloniarra; Lakecia Benjamin saxofonista amerikarra; Eddie Henderson tronpetista handia, boskotean, Steve Davis tronbonistarekin, eta azkenik, Carolina Katum artista mexikarra, Akitanian ezarria.

Uztailaren 25ean, osteguna, Keler Gunean, agertoki honetan tokiko musika-eskaintza bikaina duen edizio honetan, bi euskal talde izango dira: batetik, Merina Gris, proposamen gipuzkoar garaikide eta bikaina; eta bestetik, Shinova, penintsulan goraldian diren indie taldeetako bat.

Benin, Mali eta Kongokoak jatorriz, Les Amazones D’Afrique taldeko abeslari ikusgarriak, berritasuna ekarri diotenak Afrikako popari, uztailaren 26an arituko dira. Egun berean, El Columpio Asesino taldeak, beren ibilbideari azkena ematen dien biraren barruan, agur esango die Zurriolako hondartzara hurbilduko zaizkien jarraitzaileei. Agur hunkigarria izango da egun horretakoa, publikoak haiekin elkar hartuta dena emango duen kontzertu honetan.

Keler Guneko kontzertuei amaiera emateko, aurreneko egunean hasi genuen estilora itzuliko gara, bluesaren eta hegoaldeko rockaren erreferentziazko North Mississippi Allstars taldearekin, ibilbide luzea, osatua eta askotarikoa egina duenarekin. Agertoki honi azken agurra egiteko Chill Mafia iruindar taldea izango dugu edizio honetan.

Agertoki honi gure babesle nagusi KELERek ipini dio izena: KELER GUNEA. Eta, aurreko edizioetan bezala, hondartzan kokatuko da, Zurriola hondartzan, morruari itsatsita.

JazzEñe 2024

JazzEñe 2024k zortzi kontzertu eskainiko ditu lau saio bikoitzetan, uztailaren 24tik 27ra. Emanaldiak 12:30ean hasiko dira Donostiako Victoria Eugenia Antzokian. Nazioarteko programatzaileei zuzendutako Espainiako Jazzaren erakustaldiak aurten betetzen du bere hamargarren edizioa, eta lau urtez jarraian, Donostiako Jazzaldiaren baitan programatu da hiriko Udalarekin eta Donostia Kulturarekin lankidetzan.

Hauek dira zortzi talde hautatuak eta emango dituzten kontzertuen datak:

Uztailak 24 (12:30):

-Trinidad Jiménez
-Roberto Nieva 4tet

Uztailak 25 (12:30):
-Mariola Membrives Trio
-R.S. Basque Faktor

Uztailak 26 (12:30):
-David Sancho
-Juan Saiz

Uztailak 27 (12:30):
-Marcelo Escrich Silent Quartet
-Martín Leiton Quartet

Sarrerak salgai eta kontzertuak streaming bidez

Sarrerak salgai daude dagoeneko (prezioa 8 €) baita Victoria Eugenia Antzokirako abonamenduak ere (prezioa 44,2 €). Abonamenduan JazzEñeko 4 egunak eta William Parker Trio taldearen kontzertua (uztailaren 28an 12:30ean) sartzen dira. Jazzaldiaren webgunean, Donostia Kulturaren webgunean eta Victoria Eugenia Antzokiko leihatiletan eros daitezke.

Kontzertuen gehieneko edukiera 840 eserlekukoa izango da, eta kontzertu guztiak streaming bidez emango dira Youtubeko Jazzaldia Live kanalean; esperientzia horrek jarraipen handia izan zuen aurreko hiru edizioetan.

Detritus da kartelaren egilea

Margolari, kartelgile eta marrazkilari donostiarrak Arte Ederretako lehen kurtsoa egin zuen Leioan, 1982-83 ikasturtean, eta orduan hasi zen pintzela erabiltzen kartelgintzako estiloarekin, aurretik komikiak marraztuz ikasitakoa jasota. Detritusek gaur arte mantendu eta garatu du estilo hori, obra berean testua eta irudia uztartuz.

80ko hamarkadan Euskal Herriko mugimendu alternatiboan murgildu zen, eta kartel ugari egin zituen hainbat gairi buruz: punka, okupa mugimendua, feminismoa, antimilitarismoa, ekologismoa… Ondoren, Bilboko beste talde artistiko batzuetan parte hartu zuen, tartean Safi Gallery-n eta Las Chamas-en.

Jarduera artistiko pertsonal horrekin batera, Detritus antzerkiko eszenografietan eta hainbat filmetako dekorazio arloan aritua da.

59. Jazzaldiko kartela, artistak berak, Detritusek, 70eko hamarkadaren amaieran eta 80koaren hasieran Jazzaldiari buruz dituen oroitzapenetan oinarrituta dago. Urte haietan, Donostiako jaialdi honek hiriaren itxura monokordea aldatu zuen kartel berriekin, kalean jotzen aritzen ziren bandekin, eta bisitarientzako logela handi gisa egokitutako Carmelo Balda pilotalekuarekin. Musikak eragindako emozioak, egun haietan, eten egiten zituen eguneroko betebeharrak, eta artista bera beste erritmo existentzial batean murgiltzen zuen. Arrazoi horiengatik guztiengatik, kartelaren egileak dioenez, “oso atsegingarria zait estilo kartelista, mugimendu alternatiboetan garatua, Jazzaldiaren izaerara egokitzea”.

Detritusek lortu egin du bere kartelak, Jazzaldia iragartzeaz gain, musikaren soinua jasotzea. Horrela, artistak berak azaldu duenez, agertoki urdinxka batean ageri den abeslaria errotulu gorri eta arrosakara bat abesten ariko litzateke; laukizuzen berde azidoek saxoaren tonu altuak irudikatuko lituzkete; eta saxofonista aldi berean izango litzateke abeslariaren entzumena eta belarritakoa, eta, bere soinu horiarekin, abeslariaren masailezurra osatu eta haren ahotsa bultzatuko luke.

 
jazzaldia.eus

Laburrean

Non