Bilboko Udalak EXPODISTRITO aldi baterako erakusketa deszentralizatuen zikloa antolatu du berriro. Irailetik aurrera programa honen edizio berriak argazkigintzako eta arte plastikoetako proposamen ugari aurkeztuko ditu.
Erakusketa hauetan parte hartuko duten artistak hauek dira: Marta Calvo Bilbao (pintura); Laura González (ilustrazioak eta argazkiak); M'Angel Manovell (pintura); Carolina Zuluaga Zuleta (pintura); Mertxe Amondarain (marrazki digitalak); Las Cuatro Esquinas kolektiboa (argazkia); Musika Bulegoa elkartea (argazkia); eta Euskal Akuarelarien Elkartea.
Irailaren 1ean hasi eta 2026ko urtarrilaren 5era arte, Bilboko auzoetako Udaltegiek ziklo honetako erakusketak hartuko dituzte. Atal berri honetan, San Inazio-Ibarrekolanda, Castaños, Otxarkoaga, Begoña, Santutxu, San Frantzisko, La Bolsa, Abando eta Errekaldeko Udaltegietan Expodistrito elkartearen proposamen artistikoez gozatu ahal izango dute.
Erakusketa guztiak doakoak izango dira eta goizez eta arratsaldez bisitatu ahal izango dira. Egitarau osoa www.kulturabarrutik.eus webgunean kontsulta daiteke.
EXPODISTRITO PROGRAMA, IRAILETIK ABENDURA
AKUARELARIEN EUSKAL ELKARTEA.
Erakusketa kolektiboak Euskal Akuarelarien Elkarteko akuarela tailerretako ikasleek egindako lanen aukeraketa biltzen du. Prestakuntzan zehar, ikasleek Carlos Espiga, Julio Gomena, Irene de Madrazo, Idoia Lasagabaster, Noemí González eta Mendo profesionalen gida izan dute.
EUSKAL AUSTRALIAR ELKARTEA. "Basques in Australia"
Erakusketa hau osatzen duten 10 paneletako bakoitzak Australiarako euskal emigrazioari buruzko gai bat garatzen du. Argazkietako irudiek eta tokiek gizon eta emakume migratzaileen historia komun eta aldi berean berezi horren zati bat irudikatzen dute. Ibilbide bisual eta emozionala Australiako euskal diasporako komunitatearen oroimenean, identitatean eta bizipenetan barrena.
Bisita gidatua abenduaren 12an 19:00etan (Abandoko Udaltegia).
MARTA CALVO BILBAO. "Irekitzen diren ateak eta paisaiak/Puertas y paisajes que se abren"
Pintura-erakusketa honek jendea koadroetan islatutako ezagutza pertsonaleko bidaia ikustera gonbidatzen duen artista baten lanak erakusten ditu. Margolariak bere begiek ikusten dutena adierazteko eta besteekin partekatu ahal izateko duen beharretik abiatzen dira obrak.
LAURA GONZÁLEZ. "HaziBiziArtea-Zientzia eta artea elkarrizketan"
Erakusketa honek Euskadiko laborantza-barietate tradizionalen garrantzia aztertu eta nabarmentzen du, lurraldeko nekazaritza-kultura artearekin lotuz, ilustrazio botanikoen, argazkien eta lagin biologikoen bidez. Biodibertsitate landuari eta zaintzen duten eskuei egindako omenaldi bat; erakusketak askotan oharkabean pasatzen denari hurbiletik begiratzera gonbidatzen gaitu.
Bisita gidatua azaroaren 21ean 19:00etan (La Bolsa Udaltegia).
M 'ANGEL MANOVELL. "Haizea, ura, lurra/Viento, agua, tierra"
SUMI-E edo tinta-pintura, jatorriz txinatarra izan arren, Japoniako historiari lotuta dago. Erakusketan ikusgai dauden piezak artistaren hurrengo poema-liburu baten parte dira eta margolanez eta haiku eta tanka motako poesia japoniarraren adibideekin osatuta egongo da.
Bisita gidatuak: irailaren 5ean eta 19an; urriaren 3an eta 17an; azaroaren 21ean, 19:30etan.
CAROLINA ZULUAGA ZULETA. "Zeharkaldia / Travesia"
Arkitekto eta artista kolonbiar honen lanaren erakusketa piktorikoa. Bere marrazkietan, emakumeek borrokarako eta gainditzeko duten gaitasuna erakusten saiatzen da, egoera zailetan dauden edo egon diren beste emakume batzuei babesa eta elkartasuna emateko.
Bisita gidatua irailaren 18an, 17:00etan (San Frantzisko Udaltegia).
LAU IZKINAK. "Inguruneari begira / Miradas sobre el entorno"
Las Cuatro Esquinas taldea lau argazkilarik osatzen dute: Iñaki Laka, Juan Ignacio Llana, Javi Trapero eta Félix Pérez. Erakusketa honetan, bizi garen paisaia ikuspegi pertsonal eta anitzetatik aztertzera gonbidatzen gaituzte, egunerokotasuna aurkikuntza berri bihurtzeko.
Bisita gidatua abenduaren 29an, 19:00etan (Abando Udaltegia).
MERTXE AMONDARAIN. "Begiek min eman arte / Begiak duelatu arte"
UNRWA Euskadi Palestinako errefuxiatuentzako Nazio Batuen Agentziarekin eta Bilboko Udaleko Giza Eskubide, Bizikidetza, Lankidetza eta Kulturartekotasun Sailarekin lankidetzan garatutako erakusketa. Gazako zerrendak pairatzen duen egoera larriaren kontakizuna osatzen duten irudien multzoa da, bertako jendea ez ahazteko eta laguntzeko modu bat bezala.
Bisita gidatua urriaren 2an, 19:00etan (Abandoko Udaltegia).
MUSIKA BULEGOA. "Musika eta Euskara"
Musika Bulegoaren X. urteurrenean, erakusketa hau "Euskal musika" bezala ezagutzen den kultur mugimenduaren ideiaren inguruko hausnarketa gisa sortu zen. Horretarako, gaur egun arte euskarak musikan izan duen erabileraren lehen aurrekarietatik abiatzen den ibilbidea egiten du.
Xabi Erkizia erakusketaren komisarioarekin bisita gidatua, azaroaren 6an, 19:00etan (Abandoko Udaltegia).
EXPODISTRITO programa hiriko adierazpen artistikoak deszentralizatu, artista berrien lana jendaurrean aurkeztu nahi duen eta dagoeneko ospetsuak diren beste batzuen erakusleiho izan nahi duen Bilboko Udaleko Kultura Sailaren ekimen bat da. Artearen eta sormenaren sektoreari laguntzeko ekimen hau Bilboko 2023-2033 Kultura Plan Estrategikoak jasotzen duen hiribilduko sorkuntza eta berrikuntza bultzatzeko estrategiaren zutabeetako bat da.
Ohi bezala, erakusketak txandakatuz joango dira eta horietako bakoitzaren data zehatzak Udaltegietan bertan kontsultatu ahal izango dira, Barrutietako kultur programazioa jasotzen duen webgunean (www.kulturabarrutik.eus) eta 010 telefonoan.
