Bilboko Udalaren Bidebarrieta Kulturgunean honako hauen liburuen aurkezpenak egingo dira irailean: Katixa Agirre, Alejandro Palomas, Santiago Roncagliolo, Rosa Montero, Xabi Uribe-Etxebarria, Elena Medel eta Cesar Gellida. Topaketak irailaren 14, 15, 17, 21, 23, 24 eta 28an izango dira, hurrenez hurren, 19:00etan hasiko dira, eta streaming bidez jarraitu ahal izango dira.
Nobela intimo eta argitsu hau familiari, memoriari eta belaunaldien arteko loturei buruzkoa da. Mika, zazpi urteko neskatoaren, eta haren aitonaren inguruko istorioa kontatzen da. Munduari beste leku batetik begiratzeko aukera ematen dien harreman bereziak elkartzen ditu biak, helduak beren bizitzak ordenatzen saiatzen diren bitartean. Itxuraz sinpleak diren galderen, isiltasunen, oroitzapenen eta eguneroko keinu txikien bidez, autoreak denbora igarotzen denean irauten duen horri buruzko hausnarketa egiten du: maitasuna, memoria, natura eta nahi dugunengan uzten ditugun aztarnak.
Alejandro Palomas (Bartzelona, 1967) idazlea, itzultzailea eta literatura-tailerretako irakaslea da, Espainiako narratiba garaikideko ahots ezagunenetako bat. Ingeles Filologian lizentziatu zen, eta San Frantziskoko New College eskolan Poetika masterra egin zuen. Literatura-ibilbidea “El tiempo del corazón” (2002) liburuarekin hasi zuen, eta, ondoren, “El secreto de los Hoffman”, “El alma del mundo”, “Una madre”, “Un perro”, “Un amor” eta “Azaña”. Los que vivieron” eleberriak etorri ziren, poesiako eta haur eta gazte literaturako beste hainbat liburuz gain. Haur eta Gazte Literaturako Sari Nazionala jaso zuen “Un hijo” lanarengatik (2016) eta Nadal Saria “Un amor” (2018) eleberriarengatik. Haren liburuak hizkuntza askotara itzuli dira.
