Bilboko Arte Ederren Museoak Norman Fosterrek eta Luis María Uriartek diseinatutako handitze-proiektuaren azken fasea amaitu du. Une berezi honetan, herritarrak inaugurazio-astean aktiboki parte hartzera gonbidatu nahi ditu. Urriaren 6tik 13ra egingo da, museorako sarrera doakoa izango da eta, horrela, etapa berri honen hasiera elkarrekin ospatu ahal izango da.

Museoaren eraldaketak hazkunde handia dakar, bai espazioetan, bai funtsen aldetik. Zabalkuntzak 6.000 metro koadro gehitzen ditu, baita erakusketarako eta erabilera publikorako espazio berriak ere, Museoaren eraikin historikoak Norman Fosterrek eta Luis María Uriartek diseinatutako bolumen berriarekin integratuz. Espazioen zabalkuntzari bilduma propioak etapa berri honetan hartzen duen protagonismoa gehitzen zaio; bereziki, Plácido Arangoren bildumako 100 obra baino gehiago, 2030. urtearen amaierara arteko iraupen luzeko maileguan Museoari lagatakoak.

Inaugurazio-programa (urriaren 6tik aurrera):

• Bildu(e)mak – Bildumak — bilduma iraunkorraren aurkezpen berria, 1.000 obra inguru eta 150 obra berri baino gehiago bilduko dituena.
  
  
• Hasieraren bila. Plácido Arangori omenaldia — Arango bildumako ehun obra baino gehiago eta Prado Museoa, Metropolitan Museum edo Hispanic Society bezalako erakundeen aparteko maileguak.
  
  
• Itsasoz haraindiko ikuspegiak. Patricia Phelps de Cisneros Bilduma — Latinoamerikaren irudikapenen inguruko 180 obra baino gehiago.
  
  
• Balerdi. Lerro infinitua — Rafael Ruiz Balerdiren berrogeita hamar marrazki baino gehiago, 1950eko hamarkadatik bere ibilbidearen amaierara artekoak.
  
  
• BBKmuseoa. Anthony Caro + Itziar Okariz — inaugurazio-programaren parte den beste proposamenetako bat.