Ohean, bizitzan bezala, bueltaka eta bueltaka ibiltzen gara, gure tokia, lekua eta eroso sentitzeko eta atseden hartzeko aukera ematen digun jarrera aurkitu arte. Istorio honetako protagonistek ere bueltaka eta jira-biraka ibili behar dute, porroten eta ihesen bidaia batean…

Beren lurraldean petrolioa aurkitzen dutenean, etxetik eta bizilekutik kanporatuak dira, eta zazpi urteko exodoari ekiten diote, azkenean itsasoa duen herri batera iritsi arte. Han finkatu, arrantzatik bizi eta lagunak egiten dituzte. Baina petroliontzi baten hondoratzeak hondamendi ekologikoa eragiten du, eta lana galtzen dute.

Berriro ere, hutsetik hasi behar dute, oraingoan hiri handi batean. Han, ordea, gehiegizko kontsumismoak zorpetzera eta dena galtzera eramaten ditu. Azkenean, garaipen txiki batek beren patuaren jabe bihurtzen ditu.