Sala BBKren seigarren ekoizpen propioa, kasu honetan Tartean Teatroa konpainia bizkaitarrarekin batera, irailean estreinatuko da euskaraz eta urrian gaztelaniazko bertsioan. Antzezlan honen abiapuntua gertaera latza da: 8 urteko neskato baten suizidio saiakera. Horren gainean eraikitzen da dramaturgia, gizarte hautsi, krudel eta zeharo depresibo batek haurtzaroan duen eragina agerian uzten duena.
Maddi txikia bolada txarra pasatzen ari da. Ez du jateko gogorik, eskolako notek okerrera egin dute nabarmen. Gurasoek ez dakite zer egin alabarekin, ez baitu inolako azalpenik ematen. Azkenean, psikologo baten kontsultara eramatea erabaki dute. Baina inork ezingo du ahalegin tragikoa saihestu.
