Aurten ere Museoen Nazioarteko Eguna Bizkaian ospatuko da programazio berezi eta doako sarrerekin Bizkaiko museo gehienetan, gainera tailer ezberdinak antolatuko dira aire zabalean eta lurraldeko 45 museoak egun bakar batean ezagutzeko aukera izango da. Ekimen honi buruzko informazio guztia, baita Bizkaiko museoen eskaintza ere, museoeneguna.eus webgunean dago eskuragarri.
Datorren maiatzaren 18an, Bizkaiak bat egingo du Museoen Nazioarteko Egunarekin, Bizkaiko museo-eskaintza aberatsa eta askotarikoa herritarrei hurbiltzeko proposamenarekin. "Bizkaia Museoz Museo, aukeratzeko beste" lelopean, Bizkaiko Foru Aldundiak, lurraldeko museoen ordezkaritza zabalarekin batera, maiatzaren 18an egingo diren ekimenak aurkeztu ditu.
Museoen artean, maiatzaren 18an Encartada Fabrika-Museoa (Balmaseda) doan bisitatu ahal izango da
La Encartada Fabrika-Museoa museo industrial bat da, fundazio-garaiko (1892) erreferente guztiak biltzen dituen fabrika-gune bat ezagutzeko aukera ematen duena. Horien artean, XIX. mendearen amaierako eta XX. mendearen hasierako makineria-bilduma bikaina nabarmentzen da. Bere irudia eta hornidura teknologikoa ia osorik gorde ditu, eta produkzio-prozesuaren urrats guzti-guztiak osorik mantentzen ditu, lehengaia gordinik hartzen denetik hasi eta produktua paketatu eta bidaltzen den arte. Osotasun tekniko horrek eta bere kontserbazio-egoera bikainak ehun-lantegi zahar hau bere generoan bisita daitekeen ale paregabea izatea eragiten dute.