Bilboko Udalak Zirkualde Zirkuko-arteen Jaialdia antolatu du aurten ere. Jaialdia Errekalde auzoan egingo da, eta XVII. edizioa izango du aurten. Ekimen hau Bilboko 2023-2033 Kultura Plan Estrategikoaren jarduera-ildoetako bat da. Plan horren lehentasunen artean kultura-programazio egonkorra, plurala eta kalitatezkoa finkatzea dago, bai eta hiriko barrutietan kultura-jarduerak deszentralizatzen jarraitzea ere.
Hiru egunez, irailaren 17tik 19ra, Jaialdiak Errekalde Plaza izango du agertoki nagusi, eta zazpi konpainiak akrobazia, kale-antzerki, aire-joko, zirku eta clown garaikidearen proposamenak partekatuko dituzte publiko guztientzat. Zikualde da Euskadin zirkuko arteei osoki eskainitako ekitaldi bakarra.
Jaialdian parte hartzen duten hiru konpainia, La Côte Folle okzitaniarrak, Cía Totaperdra katalanak eta Edu Manazas aragoiarra, EKO – Pirineos de Circo proiektutik datoz, eta Bilboko Udala proiektu horretako bazkide da. 2024-2027 aldirako mugaz gaindiko lankidetza-proiektu europarra da, eta aukera ematen die artistei hainbat sorkuntza-gunetan egoitzak egiteko, euskarri ekonomiko bat eskaintzeaz gain.
Gainera, Jaialdiaren esparruan, El Fango Kiroldegiak Dantza Bertikalaren IV. Topaketa hartuko du. Bertan, irailaren 17an, osteguna, aireko dantzaren modalitate honetako publikoarentzat bi erakusketa ireki eskainiko dira.
Gainera, aurten, Zirkualderekin batera, "Emakumea zirkuan" jardunaldiak antolatu dira, irailaren 16an eta 17an, Errekaldeko Udaltegian.
Zirkuko arteei buruz Euskadin egiten den jaialdi bakarra da Zirkualde, eta zirku garaikidearen diziplina guztiak uztartzen dituzten askotariko ikuskizunak biltzen ditu.
ERREKALDE PLAZAN
18:30ean. DUO LAOS – “Espai Vital” (40 minutu)
Espazio artistiko eta pertsonala partekatzen duten bi zirku-artista euren arrakastei eta zailtasunei buruz hausnartzen hasten dira. Etengabeko mugimendu baten mende daudelarik, ustekabekoak ikaskuntza bihurtzen dira, inprobisazioa funtsezkoa baita existentziari aurre egiteko. Dantza, akrobazia, poesia eta antzerkia, neska batek kontatuko duen bizitza-istorio batean, non seme-alabek gurasoei lagun egiten dieten.
19:15ean. LA CÔTE FOLLE – “Entre bous i vaques” (55 minutu)
Bost akrobatak, eskuz esku eta mugimenduaren bidez, partekatutako espazio batekin eta objektu komun batekin duten harremana aztertzen dute: amonaren egongelaranzko zubi bihurtzen den aldamio bat. Hondatutako garun baten oroitzapenetan barrena egindako bidaia, sentsibilitatearen eta umorearen artean. Ahaztea ez litzateke inoiz desagertzearen sinonimo izan behar.
EL FANGO KIROLDEGIAN
20:30ean. Dantza bertikaleko piezen erakusketa
Dantza Bertikalaren IV. Topaketaren esparruan, diziplina honetako profesionalak El Fango Kiroldegian (Errekalde), aireko dantzaren modalitate honetara hurbildu nahi dutenei irekitako erakusketa batean parte hartuko dute.
ERREKALDE PLAZAN
18:00etan. EDU MANAZAS – “Meraki” (55 minutu)
Merakik gure ekintzen sormenaz eta grinaz hitz egiten digu, egiten dugun horretan gure esentzia jartzeaz, geure arrastoa uzteko eta arrasto hori gure bizitzan gera dadin. Geure bertsiorik onenaz gozatzeaz. Denbora agortu baino lehen. Eduk taularatzen duen proposamenak hasieratik liluratzen gaitu teknologiarekin nahasten den malabaren teknika eta ikerketa landu baten bidez, eszenaratze zaindu batek lagunduta.
19:00etan. TOTAPEDRA – “Pifia” (45 minutu)
Pifia clown eta zirku garaikideko ikuskizun bat da. Akatsen eta umorearen bidez, lan-munduaren gaineko begirada absurdo eta kritiko bat proposatzen dugu. Egunerokoan langile askorentzat guztiz errealak izan litezkeen zentzugabeko gorabeheretatik abiatzen gara. Normalean agerian geratzeko lotsagatik ezkutatzen ditugun egoerak argitara ateratzen ditugu Pifia-n. Zein da gure lekua, guk jasan dezakeguna baino gehiago eskatzen digun sistema batean? Washington trapezioan espezialistak.
ERREKALDE PLAZAN
19:00etan. BLEDA INSÍPIDA – “Last Triggers” (55 minutu)
Aliciaren espazio mentaleko autoepaiketa batek ikuspegi asko txandakatzen ditu gertaera bortitz jakin baten ondoren (errepide nazional batean jazotako istripua). Mugimendua, testua eta aireko akrobaziak, tonu tragikomikoan. Last Triggers-ek tragikomikoki eta erraietatik sakontzen du indarkerian eta haren eragileetan, joan den mendeko film zabalduenen hizkuntza deskonposatuz, non testu absurdu-epiko bat botatzen duten norbait akabatu aurretik. Oraindik gure parte izan daitezkeen indarkeria deskonposatuak. Mugimenduan eta antzerki fisikoan espezializatutako konpainia.
Jaialdiaren esparruan, dantza bertikalaren IV. Topaketa ere egingo da, dantza bertikalaren eta arnesezko lanaren arloko profesional eta erdi-profesionalei zuzenduta. Bilboko Udala La Glo Zirko eta Dantza Konpainiarekin elkarlanean ari da Errekalden, El Fango Udal Kiroldegian, egingo diren jardunaldiak antolatzeko.
Lau egun horietan, hitzaldiak eta mahai-inguruak izango dira, baita diziplina horretako profesionalek eskainitako tailer eta ikastaro teorikoak ere. Halaber, publikoari zabalik egongo den jarduera bat egongo da, irailaren 17an, osteguna, El Fango aretoan, 20:30ean, dantza bertikaleko pieza laburren erakusketa. Bertan parte hartuko dute Maitane Sarralde artistak "A-Terra/Lur-Ikara (Work In Progress)" lanarekin eta Magalie Lanriot & Roel Seeberrek "Open Book" lanarekin.
Aurten, Zirkualde ospakizunarekin batera, "Emakumea zirkuan" jardunaldiak antolatu dira, irailaren 16an eta 17an, Errekaldeko Udaltegian.
Programazioan solasaldi bat izango da, Vicente Ansolaren argazkiekin, Francisco Martín Medranoren eskutik, hilaren 16an, asteazkena, 19:00etan. Bertan, XX. eta XXI. mendeetako zirkuko mugarriak erakusten dira, zirkuko 40 emakumeren bizipenen bidez. Ostegunean, hilaren 17an, 17:30ean, Pedro Garrido Cearen "Tonetti, un pequeño milagro" dokumentalaren emanaldia izango da. Dokumentalak zirkuak gizartearentzat izan duen garrantzia erakusten du. Gainera, Atlas zirkuko emakumeek zirkoarekin izan zituzten zerikusia dutela aitortuko da.
