Gasteizko 2026ko Andre Maria Zuriaren Jaiak abuztuaren 4tik 9ra bitartean ospatuko dira, eta 400 ekitaldi baino gehiagok osatuko dute egitaraua. Abuztuaren 4an txupinazoa botatzen da, arratsaldeko seietan Andre Maria Zuriaren omenezko jaien hasiera iragarriz. Jarraian, Zeledonen Jaitsierarekin jaia lehertuko da Gasteizen.
Aurten hiria lehenago murgilduko da dibertsioan, jaien aurreko ospakizunak indartu egingo direlako. Bi kontzertu bikain aurreikusi dituzte: abuztuaren 3an, Foru plazan egingo dena, eta abuztuaren 1ekoa. Lehenengoan, Iñaki Palaciosek, oso ondo lagunduta, ikuskizun paregabea emango du. Bestalde, abuztuaren 1ean, Luis Aramburu Folklore Akademiaren ohiko txistu kontzertua izango da, baina laster aurkeztuko ditugun hainbat berritasun izango ditu aurtengoan. Bi hitzordu bikain horiei, gainera, abuztuaren 2an, Iñigo Etxezarretaren eskutik, iritsiko den Pregoia gehitu behar zaio, zalantzarik gabe jai hauetako une handienetako bat izango baita. Abeslari gasteiztarraren festarako deiaren ondoren, ikuskizun fresko, berritzaile eta okasio horretarako ad hoc sortutakoa iritsiko da Oreka TX taldearen eskutik. Txalapartan eta euskal sustraien soinu-unibertso eguneratuan oinarritutako talde honek elkarrizketa sortuko du Harrobi Dantza Bertikala konpainiako Janire Etxabe eta Sara Moyinoren dantza bertikalarekin. Oholtza gainean, Sua Enparantzak eta Izaro Urrestarazuk osatutako Suaro bikoteak dantza tradizionala eta garaikidea uztartuko ditu, eta, aldi berean, Itziar Garaluce artista gasteiztarrak zuzenean sortutako proiekzioek eszena girotuko dute, ikuskizunaren iruditeria zabalduz. Artista talde hau ikuskizuna eskaintzeko batuko den lehen aldia da.
Jaien aurreko egitarau horri ohiko bi hitzordu gehitu behar zaizkio: Bastidako Musika Bandaren kontzertua, uztailaren 30ean, 20:00etan, eta Araiakoarena, uztailaren 31n, ordu berean. Biak Aihotz plazara lekualdatuko dira aurten.
Urtero, udan, Vitoria-Gasteizko jaietan jende gehien biltzen duten egitarauko jarduerak Foru plazako kontzertuak dira. Abuztuaren 4tik 8ra, gauero, 00:00etan, musikaren erritmoan dardara egiten du espazio horrek, eta, aurten, hauek izango dira hori lortzeko arduradunak: Etzakit, Leire Martínez, Soziedad Alkoholika, Neomak eta Celtas Cortos.
Bost hitzorduei beste bat gehituko zaie, jaien aurreko kontzertua, abuztuaren 3an, igandean, izango dena. Beraz, sei izango dira 2026ko Andre Maria Zuriaren jaietan Foru plazan eskainiko diren kontzertuak.
Aihotz plazan, berriz, euskal musikaz goza ahal izango da. Abuztuaren 5etik 8ra, 23:00etan, honako hauek joko dute: La Txama, Olaia Inziarte, PI L.T. eta SUA.
Beste agertoki batzuk ere badaude, hala nola Falerina lorategia. Kontzertuak 19:00etan eta 20:30ean izango dira, abuztuaren 5ean Soez eta EHL Malick igoko dira oholtzara, hilaren 6an Stupid Gallos eta Outgravity, 7an Mamuak eta Edgar Allan Pop, 8an Makriba eta Dirdaia, eta 9an AC The Band eta Disolventes.
Musika izango da gauero Plaza Berrian, La Mundial, Vulkano, Los Afiliados, La fania perfect, Alaska on tour eta Jamaica Show orkestrekin, eta Probintzia plazan, berriz, musika mexikarra, kabareta, gospela eta Estopari egindako omenaldia izango dira ikusgai.
Blusa eta Nesken Kuadrillak fenomeno soziala dira, gure hiriko jai-tradizioan errotua.
Andre Maria Zuriaren jaietan, hiria alaitzen dute eta hainbat jarduera antolatzen dituzte, hala nola berbenak, haurrentzako jolasak, dastatzeak, kalejira eta paseiloak, baita hainbat lehiaketa ere, hala nola, bolak, herri-kirolak edo abarkak jaurtitzea, estropadak edo Goitiberen Jaitsiera ikusgarria.
Gainera, jaiei hasiera emateko Blusaren eta Neskaren Eguna ospatzen dute uztailaren 25ean, Santiago egunean.
Euskal folkloreak hitzordua izango du egunero Aihotz plazan, goizeko ordutegian, eta Santa Maria plazan, arratsaldeko ordutegian: kontzertuak, bertsolariak, dantza plazan… Besteak beste, Xabi Aburruzaga, Aldakan, Moonshine Wagon eta Aiko taldea izango dira bertan. Ganbera-musikak, bestalde, lekua izango du Luis Aramburu Musika Aretoan abuztuaren 6an eta 8an, 12:30ean, Akartia Lab eta Ahaire Ehoren eskutik.
Egunero errepikatuko diren beste hitzordu musikal batzuk hauek dira: Gasteizko Udal Musika Bandaren kontzertuak Florida kioskoan 13:00etan, dantzak leku berean 19:00etan, jotak Prado parkean 12:00etan eta fanfarreen eta txarangen animazioa hiri osoan zehar.
Arriaga parkeko haur-programazioa indartuko da haur eta gazteentzako jolas eta abenturako gunearekin, eta puzgarriak, jolasak, kirol-pistak eta abentura izango ditu. 4 eremu bereizi egongo dira: Txiki Gunea (0-5 urte), Haur Gunea (6-9 urte), Gazte Gunea (10-14 urte) eta Adin Anitzeko Eremu bat. Bertan, adingabeei ez ezik, laguntzaile helduek modu aktiboan parte hartzera bideratutako jarduerak egingo dira.
Horrez gain, jaiek irauten duten bitartean, eguerditan, Peñafloridako Kondearen plazan, zirku-ikuskizunak, txotxongiloak eta haurrentzako antzerkia ere izango dira. Bost ikuskizun izango dira, Ameztu, Elvi Ventrilocuo, Madiber, Ostomila eta Oihulari Klown konpainienak. Ikuskizunak 12:00etan hasiko dira, abuztuaren 7koa izan ezik. Izan ere, egun horretakoa 12:30ean izango da Edurne eta Zeledon Txikiren jaitsiera (12:00etan, Andre Maria Zurian) dela eta.
Txikienen beste kokaleku gogokoenetako bat Fernandez de Pierola Apezpikuaren Lorategietako minidiskoak dira, arratsaldero 19:00etan arrakasta handia dutenak.
Haurrentzako eskaintza osatzeko, goizez Arriagako parkean eta arratsaldez Fernandez de Pierola Apezpikuaren Lorategietan egongo den Gargantua, Erraldoi, Buruhandi, Zaldi eta Txoten Konpartsaren eguneroko ibilbideak eta gauero, 22:30ean, Olagibel kalean izango diren Suzko Zezenak nabarmendu behar dira.
Jaietako arratsaldero ehunka pertsona biltzen dituen guneetako bat Umorearen Txokoa da. Arratsaldero, Prado parkea algaraz betetzen da 19:30ean, aurten Joaquín Pajarónen eskutik hilaren 5ean Radio Pajaronia ikuskizunarekin, 6an Gurutze Beitiak eskainiko duen Yo y mis circunstancias lanarekin, eta Maria Crucshankek eskainiko duen Life is simpol lanarekin, 7an Jon Plazaolaren AA Aita lanarekin (euskaraz) lanarekin, 8an Nerea Garmendia & Carolina Noriegak eskainitako Esto no es serio lanarekin, eta Miguel Miguelen Los monólogos de Miguel lanarekin.
Antzerkiak, berriz, lekua irabazi du jai-egitarauan. Iaz, gasteiztarrek oso harrera ona izan zuten Felix Petitera joatea ez zela arazo erakutsi zutenean. Horregatik, aurten bikoiztu egin da eskaintza, saio bikoitzeko bi obrarekin: La pasión infinita abuztuaren 5ean eta 6an, eta Dulcinea 7an eta 8an.
Beste ikuskizun klasiko bat 23:00etan Mendizabalatik egiten diren piroteknia-ikuskizunak dira, Murtziatik, Granadatik, Leondik eta Zaragozatik iritsiko diren proposamen sarituekin. Era berean, Juan de Ayala plaza mundu arabiarreko sukaldaritza, artisautza eta animazioz beteko da, Zoko Arabiarrarekin eta Iradier Arena, berriz, bigantxekin, goizero, 10:30ean.
